‘Black Market’ ukai semina ngerugika Sports Toto tang ngachau asil chukai Perintah Menua
KUCHING: Sports Toto balat endar rugi di Sarawak, ketegal pengawa sekeda orang ke balat endar bejualka tikit loteri nengah chara ke salah tauka ‘black market’.
Menijer Besai Sports Toto Malaysia Sdn Bhd, Nerine Tan madah dalam kandang lima taun tu ke udah, pemisi sebuah kompeni nyual loteri ti dikemendarka, di Malaysia balat turun enggau penyampau manggai bejuta ringgit tauka pengabis kurang 10 persin setaun.
“Kitai ulih meda pengawa bejualka lumur ‘haram’ baka tu, nyadi kelebih agi di kedai kupi, kedai alai meli kredit talipaun binching, kedai nyual barang nyengkaum di rumah.
“Pengawa bansa tu balat ngachau pemisi Sports Toto,” ku iya madah ba aum pengarang berita pengudah bejadika atur pengawa muka kedai Sports Toto Siburan semak ditu, kemari.
Sama bisi enggau ngulu atur pengawa nya, Penulung Menijer Besai (Operasi Nyual Tikit Sports Toto) Sports Toto Malaysia Sdn Bhd, Lee Suan Boon, Menijer Kanan (pampang Nyual Tikit Sports Toto enggau Bejalaika Opis) Sports Toto Malaysia, R. Jagadis Kumar, Penulung Menijer Sports Toto Malaysia Timur, Renee Wong enggau Eksekutif Pengawa Nyual Tikit Sports Toto sitak menua Kuching, Helen Tay Puay Cheng.
Nerine nandu baru madahka pengawa mensia mayuh ke meli ari ‘Black Market’ nya mega ukai semina nyukung pengawa salah tang mega ngchau pemisi Perintah ke bulih asil chukai nyual tikit loteri Sports Toto.
Ku iya, di Sarawak, Perintah Menua bulih 10 persin ari chukai ke bisi ba penyampau RM1 loteri, ke ulih meri bejuta ringgit setaun.
“Nyadi rayat, kitai patut nyukung pengawa ke meri penguntung ngagai Perintah, enda ngira sapa ke nyadi Perintah laban asil nya dikena ngemansangka menua nyengkaum mayar sekula kebangsaan, polis ke nyaga pengelikun sereta mayuh bengkah utai bukai.
“Tang enti meli loteri ‘haram’, reti nya kita mega nyukung pengawa salah ke besai ke nyagka bisi bekait enggau pengawa bebaika dadah, mensia sereta mayuh bengkah penyalah bukai,” ku iya.
Nerine nandu baru madahka kelimpah ari mantu asil Perintah, Sports Toto mega bekunsika pemisi sida iya ngemansangka pengawa lumba enggau main menua, adat pesaka nyengkaum komuniti nengah tanggung pengawa rama korporat sida iya.
“Kami meri urung RM60 juta ninting taun ngagai Majlis Sukan Negara kena ijinsi nya ngemansangka lumba enggau main baka badminton enggau lumba terejun, nyengkaum melanja bejuta bejalaika program pengasih.
“Nya alai, aku ngarapka mensia mayuh deka majakka sukung kita, nyukung dagang kami ke betul lalu ukai meli loteri ‘haram’,” ku iya.
Nangkan nya, ba jaku Lee, iya madahka pengawa bejual tikit loteri ‘ Black Market’diatu ngirauka ati ukai semina di Sarawak tang mega di Semenanjung Malaysia enggau Sabah.
“Ambika chunto baka di Semenanjung Malaysia, mayuh bala nembiak enggau bejualka loteri ‘haram’,” ku iya.
Lebuh nerang pasal mensia mayuh ke ka agi meli loteri ‘ haram’ laban nyendiaka duit ke besai, iya nya nyapai RM3,500 (perais lumur satu).
Taja pia, ku iya, Sports Toto enda ibuhka penyampau duit ke disedia ulih loteri ‘haram’ tu.
Iya madah, tu laban perais ti disediaka udah ditetapka ukai semina ke Sports Toto aja, tang nyengkaum kompeni loteri bukai ke udah ditetapka di Malaysia. SIBU: Chalun ti deka disabung Parti Rakyat Bersatu ( UPP) ungkup Parlimen Lanang Andrew Ting nandu pengawa iya ngabas menua, empai lama tu tadi.
Serak tu iya enggau bala bukai datai ngabas menua tunga Jalai Stabau lalu ngena awak nya berandau enggau mensia mayuh dia.
Ba atur pengawa nya, Ting bisi diterangka enggau macham bengkah penanggul ke ditapi rayat dia nyengkaum penanggul bekaul enggau infrastruktur.
Penanggul tu baka penanggul ba sistem parit, nadai lampu jalai, jalai jai, ampuh bah enggau kabel karan menua nya ditiki randau ketegal repa.
Iya ti udah nemu semua penanggul nya besemaya deka mantaika pekara nya ngagai piak ti bekaul ngambika ulih diputar enggau lengkas.
Penatai iya maya tu bela disempulang bala bukai baka Penghulu Ten Kim Loong, Kapitan Yap Chung Kim, Kapitan Sim Chee Huat enggau Kapitan Kong Moh Hieng.