Anang kelalu nitihka ati ke tau mambarka penyerakup
KUCHING: Anang nejuka asai ati ‘munuh’ penyerakup menua.
Jaku lalau ke dipansutka Kepala Menteri, Datuk Patinggi Abang Johari Tun Openg ngelalau mensia mayuh anang kelalu nitihka asai ati ba pengawa sida iya dataika mambar penyerakup.
Bechuntoka Sarawak sebuah menua ke ngembuan penyerakup ke tegap ketegal kerejasama terit sereta sepenemu entara pupu bansa.
Ku iya, Sarawak ke digulu ulih Parti Pesaka Bumiputera Bersatu ( PBB) ngembuan pemereti ati ke tegap entara kaban parti ke bepengarap Islam sereta ke ukai Islam ulih begulai enggau likun enggau pangan diri.
Lebuh nerangka jaku iya enggau silik agi, Abang Johari nyema konsep nyadi ketuai bisi bekait enggau atur besembiang bebala mayuh ke bisi ‘imam’ enggau orang ke nitihka ‘iman’ nya.
“Pengarap nya nyerumba siku ketuai, pengawa besembiang nya tentu bisi orang ke nitih kitai besembiang, tang orang ke nitih nya di belakang, anang guai charut penemu enggau pangan diri, tang neritka agi kaul nitih ‘imam’,
“Baka nya konsep siku ketuai menua, kitai nitihka ketuai tang enti ketuai nya ngaga penyalah, kitai tau madah ngagai iya, tang bisi chara ke manah lebuh kitai madah laban kitai ada enda sempurna,” ku iya.
Abang Johari madah munyi nya lebuh bejaku nutup atur pengawa ‘Multaqa Murabbi Ummah’ renggat menua Sarawak di Dewan Majma Tuanku Abdul Halim Muadzam Shah ditu, kemari.
Sama bisi enggau ngulu atur pengawa nya, Menteri Di Opis Menteri Besai, Mejar Jeneral Datuk Seri Jamil Khir Baharom enggau Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, Datuk Seri Fatimah Abdullah.
Ba atur pengawa nya, Abang Johari bisi nerima Ungkup Ninting Taun ari Perintah Besai sereta Bayar Khas ‘One-Off’ ngagai imam, bilal, marbot, pengajar takmir enggau pengajar kafa ke menua Sarawak ke manggai urung RM46.654 juta.
Abang Johari lebuh dikerandau pengudah abis atur pengawa nya madahka Perintah Menua Sarawak nerima ungkup ke diberi Perintah Besai ngagai Perintah Menua.
Program ‘Multaqa Murabbi Ummah’ , iya nya siti kerejasama entara Opis Pemansang Islam Malaysia (JAKIM) Opis Agama Islam Sarawak (JAIS) enggau Majlis Islam Sarawak (MIS).