SMK Lutong deka ngarika Sarawak ba pekit nempa ‘Access to Engergy’ di KL

KUCHING: SMK Lutong, Miri teulihka champion pekit nempa ‘ Access to Energy’ lalu ngujungka sida dipilih ngarika Sarawak ba renggat kebangsaan di Kuala Lumpur ( KL) kena April tu ila.

Pemenang tauka SMK Lutong, Miri nerima replika champion nya ti disuaka Kepala Menteri Datuk Patinggi Abang Johari Tun Openg.

Pekit nya sebengkah ari program STEM ( Science, Technology, Engineering & Mathematics) ke dipejalaika Shell, ti dikumbai # MyGeekMovement, ke diatur nyerumba Sarawak Career & Training Fair ( SCaT Fair) 2018 ba Shell STEM Playground di BCCK ditu, ensana.

Ba renggat kebangsaan sekula nya deka betapi enggau sekula ari Sabah sereta Semenanjung Malaysia, lalu champion renggat tu deka diberi awak nemuai seraya belajar STEM ke London pengelama seminggu.

Shell ke ngatur program nya dikena ngelakuka pelajar sains, teknologi, injinia enggau matematik ba 15 buah sekula ti nyengkaum ba Sarawak, Sabah enggau Semenanjung Malaysia ti mungkur 225 iku nembiak sekula sekondari.

Ba Sarawak bisi lima buah sekula dipilih Shell ngelakuka STEM iya nya Sekolah Menengah Kebangsaan ( SMK) St Joseph, Kuching; SMK Lutong enggau SMK Merbau, Miri sereta SMK Bintulu enggau SMK Kidurong di Bintulu.

Shell bejalaika inisiatif nya ngambika ilih nerenak pengerindu nembiak sekula belajarka pekara injinis, teknologi pemadah sereta automasyen.

Dikerapka nengah inisiatif nya ulih nambahka penyampau raban graduate STEM sereta nyapai tagit ke udah ditetapka.

Inisiatif nya mega dikena nyukung pekara ti dikemeratka perintah Sarawak ba pengelandik ekonomi enggau pengawa ngemekuhka bidang sains enggau teknologi.