PEDAS, SID Bintulu nemuai seraya nyua bantu ngagai Rh Nyipa di Pandan, Sebauh
MIRI: Serakup Dayak Sarawak (PEDAS) Pampang Bintulu bekerejasama enggau Serakup Iban Dayak (SID) Bintulu apin lama ke udah bisi ngatur pejalai nemuai pengasih seraya ngabas rumah panjai bansa Punan ti udah dituntung penusah angus dalam bulan Febuari tu tadi.
Penemuai pengasih ti diatur begulai dua bengkah Gempung Ukai Dikuasa Perintah (NGO) enggau batang tuju pejalai nganjung bantu barang pemakai enggau kereban guna ninting hari ke bukai ngagai sida ti tasah angus.
Sepenyampau 35 iku kaban PEDAS enggau SID ari Bintulu udah ngambi bagi pejalai ngena entukar bebala mayuh ngagai Rumah Nyipa, rumah panjai di Pandan, Sebauh, urung 56 kilometer penyauh ari pasar Bintulu.
Diketuaika Ketuai Pedas Bintulu, Pete Bujang, sida mupuk ngena tujuh buah entukar 4WD enggau pikap.
“Penyauh menua ke dilawa enda nyadi penekul ngagai raban PEDAS datai sereta manti sida ti seranta tauka begunaka sukung kitai.
“Taja jauh pejalai, tang pengeran kami nganjung bantu sereta nentuka barang ti dipupu diterima raban diselinting – sida ti tasah angus di Rumah Nyipa,” ku iya.
Nitih ku Pete, kesemua pemeri nya datai ari bala kaban PEDAS enggau SID di Bintulu, lalu iya ngarapka bantu nya deka ngelempung- ka tating penusah peranak rumah panjai nya.
Ngelansa silik ku iya, pengawa meri bantu ke bansa nya endang nyadi batang pengawa dikemeratka raban serakup dikena nerenakka tanggungpengawa enggau penyiru ngagai bala kaban ba kededua gerempung.
“Kitai deka nyediaka awak ngagai bala kaban dalam kededua serakup bejalaika pangku pengawa sida mantu raban seranta, nyengkaum gawaka komuniti,” ku iya.
Ngelansa penusah ke nyadi kena 4 Febuari nyin tadi, bisi 460 iku peranak Rumah Nyipa semina tinggal gari di punggung pengudah rumah sida angus lengis diempa api urung pukul 9.50 malam.
Bisi 36 ari 63 pintu bilik rumah panjai udah angus lengis, ngujungka sida ti tasah nadai endur diau lalu semina diau ngenduh ba rumah kaban belayan enggau bala bakih ke bukai.