Miri ngembuan mayuh palan ti engkeman sereta tanah bebukit ti ulih endur bejalaika pengawa betanam betupi: Uggah
MIRI: Kandang menua utara Sarawak kelebih agi Miri chakah dalam industri betanam betupi moden, pia ku Sapit Kepala Menteri Sarawak Datuk Amar Doughlas Uggah Embas.
Ku Uggah madah, nengah program ngelawa sekeda palan betanam betupi tanah bebukit ba Thailand bedau lama tu tadi, iya pechaya konsep betanam betupi di menua nya ulih dikena ba Miri, laban kandang menua tu ngembuan mayuh palan ti engkeman sereta tanah bebukit ti endang manah baka ba Baram.
“Aku baru pulai ari Thailand lalu udah meda peranak di kandang menua tanah bebukit dia endang bekerejasama bejalaika pengawa ti ngaul komuniti. Beserimbai enggau nya, aku ngarapka Miri ulih nyadi pemungkal dalam pemansang industri betanam betupi.
“Pengawa tu ulih dipejalai, laban Miri endang ngembuan mayuh orang dagang dalam sektor betanam betupi ti nyulut lalu ulih nyadika chunto ngagai sida ti deka ngaul diri ba industri tu,” pia ku iya bejaku maya pengerami makai lemai ngintu Taun Baru China ke diatur Persatuan Penanam Bahagian Miri enggau Koperasi Pembangunan Pertanian Bersatu Timur Berhad ba sebuah hotel ditu kemari.
Dulu agi ari nya, Uggah ke mega Menteri Betanam Betupi Moden, Tanah Adat enggau Pemansang Kandang Menua Sarawak udah datai ngulu aum begulai enggau kaban gerempung nya sereta koperasi.
Iya muji pengawa sida ti nyaut peminta Kepala Menteri Datuk Pabebukit Abang Johari Tun Abang Haji Openg ti randaka rayat ngena teknologi digital dalam ngemansangka sektor betanam betupi datai ba taun 2030.
“Kelebih agi Miri ti ngembuan mayuh pengulih, nya alai Abang Johari ngengkahka siti tagit. Tu ukai pekara nyamai laban pengawa betanam betupi ditu mayuh agi ti ungkup guna kediri empu lalu ukai digaga ungkup eksport.
“Beserimbai enggau nya, kitai deka ngiga pengawa ti baru sereta ti pemadu manah dikena ngemansangka sektor betanam betupi ngambika dinamik agi sereta ulih besemekih,” ku iya nyemetak.
Ba aum nya, Uggah mega udah diberi penerang mimit ari Koperasi Pembangunan Pertanian Bersatu Timur Berhad bekaul langkar projek nanam nanas MD2 ba Miri.
“Entara pekara ti bisi dalam langkar tumu tu iya nya nentuka palan pemesai 100 ikar dikena mungkal projek tu,” ku iya.
Ba pengerami nya, Uggah udah madahka deka meri ko- perasi agih belanja sepenyampau RM50,000, lalu Menteri Muda Kaunsil Kandang Menua Datu Penguang Manggil (RM20,000), Menteri Muda Dagang Temuai, Seni enggau Main Asal Datuk Lee Kim Shin (RM20,000) sereta Kaban Kunsil Nengeri Piasau Datuk Sebastian Ting enggau ADUN Telang Usan Dennis Ngau bela meri RM10,000.
Sama bisi datai Datuk Bandar Miri Adam Yii, Residen Miri Sherrina Husssaini enggau Chairman Persatuan Penanam Bahagian Miri sereta Koperasi Pembangunan Pertanian Bersatu Timur Berhad Jong Tze Khiun.