Mensia mayuh dilalau ngambi bagi ba lumba ti dipekit maya LISUS Sibu 2018
SIBU: Mensia mayuh ditesau ngambi bagi ba lima bengkah lumba ti deka diatur beserimbai enggau Liga Sukan Untuk Semua (LISUS) Sitak Sibu 2018 kena 17, 18, 24 enggau 25 Mac.
LISUS tu diatur Opis Raban Nembiak enggau Lumba Sitak Sibu.
Lumba ke deka diatur tu iya nya sepak takraw, futsal, main bol semilan sepiak, ‘ netball’, enggau ‘ baskteball’.
Pemesai Raban Nembiak, Lumba enggau Main Sitak Sibu Kaya Raju madah, renggat keterubah LISUS deka belabuh 17 enggau 18 Mac tu deka dipunka enggau pekit futsal lelaki enggau indu, sepak takraw enggau ‘basketball’.
‘Netball’ enggau main bol diatur kena 24 enggau 25 Mac, ku iya.
“Futsal deka diatur ba Stadium Tertutup Bukit Lima, main bol ( Stadium Tun Zaidi), sepak takraw (Gelanggang Sepak Takraw Bandong), ‘basketball (Stadium Bola Keranjang Hin Hua) enggau ‘netball’ (SK Agama Sibu),” pia ku iya madah, empai lama.
Kaya madah, pekit tu tebuka ngagai semua kelimpah sida ti kala ngarika Sarawak taun 2016 enggau 2017.
Tang taja pan baka nya, sida ke kala ngarika Sarawak taun 2015 tauka taun sebedau nya dikemendarka enggau ngambi bagi ba pekit.
“Kebuah pia laban kitai deka meri awak ngagai mensia mayuh ke bukai datai ngambi bagi ba pekit tu ila,” ku iya sambil madah sida ke ngarika sitak menua bela dikemendarka ngambi bagi.
Sida ke menang deka dipilih ngarika sitak Sibu bepekit ba renggat sitak menua di Miri kena bulan April ti deka datai.
Sapa ke bisi ati deka ngambi bagi ba pekit tau betanya ngagai Opis Raban Nembiak, Lumba enggau Main Sitak Sibu nengah lumur 084333400.
Penerang silik mega tau ditanya ba Halel Mohd Ibrahim (013-8117850) futsal enggau main bol, Junaidi Ahmad (013-8122408) main bol, Idris Alphonso (013-8115996) enggau Mohd Adruce Abdullah (012-8731204) enggau sepak takraw enggau Ling Kuok Min (013-8184556) ‘basketball’.
Bayar futsal enggau main bol iya nya RM150 lalu pekit ke bukai iya nya RM50.
Sida ke deka ngambi bagi ba sepak takraw, ‘basketball’ enggau futsal enda tau laun nganjung nama ngelui 15 Mach tu lalu main bol enggau ‘netball’ kena 22 Mac.