SARES chunto inovatif dikunsi perintah-komuniti ke ngena solar, teknologi mikrohidro ke komuniti menua pesisir
KUCHING: Inisiatif ngempung kuasa dikena ngenyampatka pengawa nyambung elektrik ngagai menua ulu sungai nyapai pemujur kemari lebuh nengeri Sarawak diberi kelala ba renggat entarabansa ba atur pengawa ‘ 4th ARE Energy Access Investment Summit’ di Catania, Sicily.
Skim Alternatif Nyambung Elektrik Chara Kedua Menua Pesisir Sarawak tauka ‘The Sarawak Alternative Rural Electrification Scheme’ (SARES), chunto inovatif ti dikunsi ulih perintah-komuniti ke ngena solar nyengkaum sistem chara kedua, ngena teknologi mikrohidro digaga ungkup ke komuniti ti diau di ulu sungai, dikelala nengah kategori ARE Awards 2018 ungkup Perintah di menua Afrika, Asia enggau Latin Amerika.
Nitih ku penerang nya, SARES, ti dipunka Perintah Nengeri Sarawak nengah opis kuasa utiliti ke diempu Perintah Nengeri, Sarawak Energy, beratika deka nyendia elektrik 24-jam ngagai urung 40,000 mensia mayuh ke diau di 8,700 ruang bilik di menua pesisir manggai taun 2020 tu ila.
Sitak menua ulu sungai nya mungkur Ulu Skrang, Katibas, Nanga Merit, Bukit Mabong, Tinjar, Long Bedian, Telang Usan, Bario, Julau, Tatau, Sungai Gaat, Sungai Pila enggau Medamit.
Projek RM500 million nya berengkah digaga dalam taun 2016, lalu ba pengujung taun 2018 tu ila, urung 90 genturung pendiau deka nerima kuasa elektrik nengah SARES, nyengkaum 210 genturung pendiau bukai sama deka nerima kuasa elektrik nya dalam taun 2020.
Ba atur pengawa nya, Menteri Utiliti Dato Sri Dr. Stephen Rundi anak Utom nerima gelar nya ngarika Perintah Menua. Sama bisi enggau ngulu atur pengawa nya, Menteri Muda (Bekal Elktrik ke Menua Pesisir) Dr Abdul Rahman Junaidi, Menteri Muda ( Bekal Ai Beresi)Dato Liwan Lagang enggau Direktor Bekal Elektrik Sarawak, Syed Mohamad Fauzi Shahab.
Sama bisi enggau ngulu pejalai sereta atur pengawa nya, pengari ari Sarawak Energy Berhad, iya nya Ketuai Pegawai Eksekutif SEB, Sharbini Suhaili enggau mandal presiden pampang Pansik enggau Pemansang, Dr Chen Shiun.
Dalam jaku Rundi, iya madahka Sarawak beratika deka nyapai 100 peratus bekal elektrik ulih dijapai, alai rayat di serata menua tu, deka ngembuan elektrik 100 peratus manggai taun 2025.
“Tu nyadi pemar laban urung 45 peratus rayat ke diau di Sarawak diau ngachir ba kandang bukit, sebelah sungai enggau di ulu entigis,”ku iya.
“Dalam kandang sepuluh taun ke udah, nengah wang turu ti diungkupka Perintah Besai enggau nengeri, Sarawak udah ngemansangka pengawa nyambung elektrik di menua pesisir, ari penyampau 56 peratus (2009) ngagai penyampau bungkur naka ke diatu, 90 peratus, muka jalai ke pemansang ekonomi rama sereta peluang ke komuniti,” ku iya.
Ba jaku iya mega, iya madah Perintah Menua Sarawak beterima kasih ke gelar ARE nya, lalu nandu baru ma- dahka Sarawak deka majakka pengawa menua tu belajar ari peneleba menua bukai sereta bekunsika pemujur menua tu, dalam pemerat meri pengelantang pendiau ngagai komuniti global menua pesisir.
Sharbini lebuh nimbal pasal gelar ARE nya, madahka kelala entarabansa tu kelala ke ngangkatka pemendar sereta pemagas ke udah digaga ulih sekeda orang ke saum sejalai nyengkaum komuniti nya empu.
“Ngemenuhka pemerat pungkal ngembuan bekal elektrik 24 jam mandangka tu meh pemungkal ke mujur agi, gaya dudi hari jemah ila. Sarawak Energy enggau naka ulih mantu menua Sarawak nyapai pemerat 100 peratus bungkur elektrik manggai 2025, ke deka meri pengelantang sereta penguntung ngagai semua rayat Sarawak, baik sida ke diau di mengeri tauka menua ke pengabis iya di ulu sungai di menua tu,” ku iya.
SARES 24 jam nyendiaka elektrik ke chukup ke tiap ruang bilik ke ngena elektrik baka kipas, television, peti ais sereta perengka guna elektrik bukai.
SARES nganti injin api ke mar, inggar sereta ngamahka rampa menua, ke semina ulih nyendiaka kuasa dalam timpuh ke pandak ngagai genturung pendiau.
Aum ‘4th edition of the ARE Energy Access Investment’ betuju nyendiaka penyereta aum nya enggau penemu ke silik gaya langkar polisi sentang kuasa ke beresi sereta trend industri berat ngambu gulai komuniti menua pesisir ngagai kechul ekonomi dunya.
Lebih 250 penyereta enggau ngulu atur pengawa nya, ke nyengkaum pemesai ari sikar gerempung ke mansang di Africa, Asia enggau Latin America sereta gerempung swasta, palan wang enggau raban penyendia teknologi ke ngaga pampang grid menua pesisir.