MPC Sarawak ngarap ulih ngada mayuh agi gerempung ke pemansang nengeri Sarawak
KUCHING: Perbadanan Produktiviti Malaysia (MPC) Pampang Menua Sarawak ngarapka sida iya ulih ngada mayuh agi gerempung ke mujur ke pemansang menua Sarawak.
Kaban Kunsil Direktor MPC, Tan Sri Dato’ Dzulkifli Abdul Razak sepenemu sereta nyukung pemerat menua Sarawak minta mayuh agi gerempung Perintah enggau swasta ngulu program pemujur nya ti bisi disediaka ulih MPC.
“Aku bisi dipadah MPC udah mayuh ngaga program pemujur gerempung berengkah ari taun siti nyin tadi, lalu ke taun tu, iya ditambah manah agi ngipak pemerat Perintah Menua ke betatika Ekonomi Digital ( DE).
“Aku ngarap pengawa bansa tu ulih mantu Perintah nyapai pemerat ke ditetapka sereta meri penguntung ngagai semua piak,” ku iya.
Iya madah munyi nya lebuh ngepunka ‘Workshop On Development of Vision, Mission and Objectives For Business Excellence’ di sebengkah hotel ditu, kemari.
Urung 19 peyereta ari ijinsi perintah enggau swasta bisi enggau ngulu bengkel sehari nya, ke bela digulu ulih Direktor MPC Pampang Menua Sarawak, Tengku Azmi Tengku Majid enggau Pensyarah Universiti Islam Antarabangasa Malaysia (UIAM), Prof. Madya Dr Suhaimi Mohd Sarif.
Dzulkifli madah, pengawa nuju pemujur nya mesti digaga enggau sistematik kena nyamin pemisi sereta asil ke dikarap ulih siti-siti gerempung.
Iya nandu baru madahka gerempung ke mujur ukai semina bepelasarka pemanah penuduk wang aja tang iya nyengkaum semua sukut nyengkaum sukut pengereja pengawa, rampa menua enggau komuniti.
“Siti- siti gerempung ke mujur seruran betatika kaul sereta pengelantang pendiau komuniti, pengguna enggau pembekal.
“Ketegal nya, ba penemu aku, bengkel tu ulih digaga nyadi atur sereta palan ke gerempung ke bisi peluang dagang ke mujur, sereta ngena nitihka idar jeman,” ku iya.