Penyukung Dr. Chella mengkang minta iya dipilih nyadi chalun PDP ke PRU ke-14
SIBU: Sida ke beempu kebun sawit di menua Julau enda lantang ati laban orang meli sawit sida tauka ‘ram’ jauh enda berega ari rega ba kilang.
Nitihka dipadah Pemansang Dayak Pampang Julau (PDC), rega ke jauh besibil tu deka ngenataika mayuh untung ngagai orang ke bempu ‘ram’ tang balat nejuka orang bekebun sawit menua nya rugi.
Di Julau bisi tiga iti ‘ram’ iya nya ba simpang KJD, simpang Pakan enggau simpang Julau ti bela nerima rega ke sebaka iya nya urung RM370 setan enti dibida enggau ba kilang iya nya RM580.
Ketuai Publisiti PDC Julau, Jimmy Manju madah, pekara nya udah lama ditapi bala ke bekebun sawit tungga ke Julau.
“Rega ke murah tu balat bendar ngasuh orang bekebun sawit rugi tang nguntungka orang bempu ‘ram’,” ku iya madah ngagai pengarang berita, kemari.
Iya madah, enti ba menua bukai baka tungga ke Bakun, ‘ ram’ menua nya nerima urung RM440 setan, Tanjung Manis (urung RM420), Suai/Niah (RM430-RM450), alai bida rega tu jauh besibil enggau rega di Julau.
Ketegal nya, Jimmy madah, gerempung sida minta piak ti bekaul baka Opis Sawit Malaysia ( MPOB) mantau rega sawit ke diterima ‘ram’ tungga menua Julau ngambika pekara nya enda majak nating bala sida dia taja pan tikas pemanah sawit di Julau bela baka ba menua bukai.
Kebuah pia ku iya laban rega sawit endang ditentuka MPOB, nitihka penyauh ari kilang.
Iya ti mega bekebun sawit madah, enti nyual ngagai kilang, kilang sawit ke pemadu semak enggau menua sida iya nya kilang sawit di Saratok, urung lebih sejam setengah ari simpang Julau kelimpah Kilang Taa Ann Durin, Jalai Lanang Sibu ti mega lebih sejam setengah penyauh ari nya.
Sentang rega sawit ke murah maya hari tu, Ketuai Operasyen PDC Julau Aron Tangai madah, piak gerempung sida minta kilang sawit mantaika berapa peratus stindit ‘Oil Extraction Rate’ (OER) ke dijual ngagai menua luar.
Ari tu ku iya, sida ke bekebun sawit tau nemu rega ke bendar minyak sawit laban kilang enda patut nyual kelalu berega ketegal minyak sawit nya sama datai ari sida bekebun sawit.
“Kilang suah bedalih madahka OER ba sesebengkah menua tu baruh tang sida nadai kala mantai ngagai kitai berapa OER tu ke bendar.
“Enti nunda sida ke bekebun sawit meseti nemu OER tu,” ku iya.
Berindik ari nya mega, Aaron minta MPOB nyaup orang bekebun mansik peratus OER lalu saup MPOB tu mega deka mantai kebuah penanggul ke bisi nyadi baka kebuah tikas pemanah minyak sawit ditu enda manah.
“Tu kira ke saup MPOB tauka ejensi perintah ti bekaul nyaup orang bekebun sawit tang ukai ngelakka sida mengkang bekebun tang nadai asil enggau penguntung,” ku iya ti bela ngemeranka pengawa bekebun sawit. SARATOK: Lebih dua puluh iku bala tuai rumah nyengkaum bala kaunselor nyukung Dr James Chella dipilih Barisan Nasional (BN) bediri ba Parlimen Saratok maya Pengawa Bepilih Besai Ke-14 (PRU14) ti deka datai tu ila.
Ketuai Sekretari Parti Progresif Demokratik ( PDP) pampang Saratok Kaunsilor Noel Tom ke ngarika penyukung Dr. Chella madahka Dr Chella agi mengkang tau dipilih ketuai parti BN nyadi chalun ba penuduk nya.
“Ari gaya ke dipeda kitai diatu, Dr James Chella agi tau dipilih nyadi chalun BN ngena tikit PDP,” ku iya.
Iya mantaika jaku tu maya ba Pengerami Dr James Chella Begulai Enggau Rayat di Rumah Juntan, Sungai Padi, Plasu, Roban, empai lama tu tadi.
Pengerami tu bela digulu Dr James enggau bini iya Dr Cindy Mason, Chairman PDP Sesang Ludy Sulong, Kaunselor Roland Angking sereta bala bukai.
Awak tu mega dikena Noel nesau rayat dia ngambika mengkang nyukung parti ke megai menua tu diatu.
“Ngarapka rayat kitai ditu enda belampung ati nyukung BN enda ngira sapa bagi cha- lun ke dipilih sida bediri ba Parlimen Saratok,” ku iya.
Pengari ari raban bansa Melayu, Ludy Sulong ba jaku iya madahka komuniti nya pechaya Dr Chella siku raban parti PDP ti engkeman ngarika rayat dia bediri ba Parlimen Saratok.
“Aku pechaya raban bansa Melayu ditu deka tegut ny- ukung Dr Chella nyema iya dipilih nyadi chalun BN ba penuduk Parlimen Saratok maya PRU14 ti deka datai,” ku iya.
Ba atur pengawa nya, Dr Chella madahka diri berasai temegah ati laban rayat ba Parlimen Saratok nyukung sereta mandangka diri rindu ke iya kenyau ari suba.
Iya madah, iya udah berandau sereta betemu enggau rayat tauka tuai raban bansa dia ari taun 2016.
Kelimpah pekara politik, Dr James ba pengerami nya mega madahka pemesai reti pemujur pelajar ba bala nembiak ti deka nyadika pengering ngangkatka pengidup diri dudi hari.
“Nya alai, enti kitai deka ngembuan pengidup ti lebih agi meruan jemah ila, kita meseti ransing sereta chakah ngemujurka diri ba pekara pelajar,” ku iya.