Dikena nentuka pemansang terus dipejalai ungkup pemaik nembiak redak seriris enggau ubah dunya kemaya hari
SRI AMAN: Bala ketuai raban bansa di pelilih tu diperansang ngemeranka ulah ti kreatif, chakah gawa, inovatif sereta panjai runding ngemansangka genturung pendiau enggau rumah panjai ke dipegai sida empu.
Sapit Menteri Dalam Menua II, Datuk Masir Kujat madah, enti sema ketuai raban bansa ngembuan ulah ke bansa nya tentu genturung pendiau tauka rumah panjai dipegai sida deka mansang lalu pulaika penguntung nembiak redak sida.
“Perintah dekaka pengudah tu, sida ti megai tanggungpengawa nyadi ketuai ke ngelangkar pemansang di rumah panjai enggau genturung pendiau patut nukar chara sida gawa nyadi kreatif agi seriris enggau ubah dunya kemaya hari.
“Tejuka chara lama lebuh ngatur pengawa lalu tukar enggau chara ti kreatif agi sereta inovatif ngambi nya pulaika penguntung semua raban kelebih agi nembiak redak dipegai kita,” ku iya.
Masir ke mega Kaban Parlimen ( MP) Sri Aman mansutka jaku nya lebuh bejaku ba Program Randau Begulai Enggau Bala Ketuai Opis, Gerempung Ukai Dikuasa Perintah ( NGO) enggau Bala Ketuai Raban Bansa di Rumah Romeneo Tugang, Nanga Skrang, Sri Aman semak ditu, apin lama ke udah.
Ku Masir nambah, siku ketuai ngatur pengawa patut panjai runding lalu suah baum enggau nembiak redak iya sereta sedia mendingka penemu sida ungkup pemansang begulai.
“Enti sema bisi ari ketuai raban bansa ngembuan ulah bansa tu tentu tetiap pekara diperambu ungkup pemansang menua deka mu- jur,” ku iya.
Berebak enggau nya, Masir mega nangkan bala ketuai raban bansa ngambi nyediaka profil genturung pendiau sida empu nyadika chuan penerang dudi hari.
“Pengawa nyediaka profil genturung pendiau beguna endar laban tetiap chuan penerang rumah panjai enggau genturung pendiau patut dipasuk dalam profil nya.
“Profil tu ukai semian nyadi chuan penerang peranak ru- mah panjai tauka genturung pendiau aja tang mega ejensi perintah baka Opis Residen, Opis Pelilih sereta Opis Pemansang Mensia Mayuh (KEMAS) suah agi begunaka dokumen nya,” ku iya madah nyemetak.
Nya alai ku iya, endang meransang ejensi perintah bekaul ti begunaka profil genturung pendiau bela sama gawa nyaup bala ketuai raban bansa nembuka profil genturung pendiau di baruh pegai sida.
Sama bisi datai Residen Bagi Menua Sri Aman, Indit Bangai, Injinir Bagi Menua Opis Kereja Raya (JKR) Sri Aman, Bujang Kanang, Penguasa Tanah enggau Survei Sri Aman, Doris Synia, pengari Ketuai Polis Pelilih Sri Aman, Asistant Supritentant (ASP) Tajim Risit, Pemesai Bomba Kanan II, Jilin Itar sereta ketuai raban bansa bukai.
Perintah dekaka pengudah tu, sida ti megai tanggungpengawa nyadi ketuai ke ngelangkar pemansang di rumah panjai enggau genturung pendiau patut nukar chara sida gawa nyadi kreatif agi seriris enggau ubah dunya kemaya hari. Datuk Masir Kujat Sapit Menteri Dalam Menua II