Sarawak deka muka opis endur ngelaku betanam betupi, dagang temuai di Singapura
KUCHING: Sarawak deka ngembuan opis khas dikena ngelakuka betanam betupi sereta dagang temuai di Singapura abis laun manggai bulan Januari 2019.
Kepala Menteri Datuk Patinggi Abang Johari Tun Openg, madahka nya baka ‘outlet’ khas ungkup Sarawak nyual ( ngeksport) asil ke menua nya nyengkaum betanam betupi.
“Kitai deka numbuhka sebuah opis khas di Singapura ti deka disikap enggau pemesai sereta bisi bilik endur baum.
“Aku udah minta Sekretari Perintah Nengeri (Tan Sri Datuk Amar Mohd Morshidi Abdul Ghani) ngambi numbuhka opis pengabis laun Januari 2019,” ku iya lebuh bejaku ba ‘Majlis Penghargaan Sekalung Budi Sejambak Kasih’ nyerumba Gempuru Besai PBB Ke-14 ditu malam ensanus.
Bejaku baru, Abang Johari madahka opis nya deka disediaka pemesai ti mega pengereja pengawa opis perintah dikena ngemudahka interaksyen.
“Kami nganjung pemesai ari pengereja pengawa opis perintah kin lalu udah tentu kitai nyendiaka kereban ke diguna sida din,” ku iya.
Ngenang silik pasal kaul dua enggau Singapura, Abang Johari madahka Sarawak dipelaba deka ngemansangka sebengkah agi kerejasama pasal ‘software’ baru ungkup transaksyen bayar ti semina ngena lumur telefon aja.
“Diatu bisi ‘software’ baru ke enda ibuh mayar ngena kod QR tang ngena lumur telefon aja.
“Maya betemu Menteri Besai enggau Sapit Menteri Besai Singapura, sida madahka bisi ati deka nempa kerejasama dalam pekara tu.
“Reti iya kitai ulih nyual asil betanam betupi ngagai Singapura lalu Singapura semina mayar nengah telefon aja ngagai kita,”ku iya seraya madahka iya begunaka saup ari opis bekuasa Singapura enggau Bank Negara Malaysia (BNM) sebedau nya.
Iya madah pekara nya udah dikenataika ngagai perintah nengeri pasal transaksi mayar nengah ‘software’ baru nya.
“Kitai mayuh peluang dalam betanam betupi lalu kitai deka ngena kaul antarabansa tu ngangkatka betanam betupi ngena teknologi,” ku iya.
Sama bisi datai bini iya Datin Patinggi Datuk Juma’ani Tuanku Bujang enggau Sapit Preaiden PBB ti mega Chairman Komiti Besai Gempuru PBB Ke-14, Datuk Amar Douglas Uggah Embas enggau bini iya Datin Amar Doreen Mayang.