SPRM nyulut nagang pengawa makai suap
KUCHING: Komiti Penagang Makai Suap Malaysia (SPRM) Sarawak dalam timpuh tujuh taun lebih tu, udah nyapai tikas penyulut ba pengawa nagang makai suap sereta ngangkatka integriti di nengeri tu.
Sapit Ketuai Komisioner (Operasyen) SPRM Datuk Seri Azam Baki madah, nya kebuah pemesai SPRM nengeri tu dipinta proaktif ba pengawa ngenukuka integriti enggau nagang pengawa makai suap di nengeri tu.
Ku iya, enti sebedau tu SPRM semina ngena chara ‘reaktif’ iya nya begunaka mensia mayuh datai ngenataika sebana tang diatu patut lebih proaktif.
“Baka ke dipeda aku, penyulut SPRM Sarawak ari taun 2010 nyentuk ke bulan Mac 2018, chukup manah.
“Penyampau keretas tasat dalam timpuh 2010 ngagai 2018 ke udah dibuka ti nyengkaum keretas tasat tebuka enggau keretas tasat ke disebut ‘Inquiry File’ bisi 1,240 iku ,penyampau ditangkap (537 iku enggau penyampau ke dituduh nyentuk Mac 2018 bisi 317 iku.
“Nya alai diatu lebuh kitai napi penyalah makai suap kitai patut ngena chara ti lebih proaktif, iya nya ke patut lebih dikemekuhka.
“Enti suba kitai semina chara reaktif, iya nya begunaka mensia mayuh ngenataika sebana ngagai SPRM tang diatu berindik ari mayuh ubah ke nyadi kelebih agi kenyau ari taun 2016, 2017 nyentuk ke diatu kes ti diayanka ba kort, ke diayanka media endang tebal agi kes asil ati chara proaktif,” ku iya.
Azam mansutka pekara nya lebuh bejaku ba Pengerami Nyerah Nerima Pangku Pengawa Nyadi Direktor SPRM Sarawak ti baru, ke diatur ba Bilik Aum Besai, Kompleks Opis SPRM Sarawak ditu, kemari.
Bejaku baru, iya madahka penyulut SPRM Sarawak nya ukai asil kediri empu tang asil ari kerejasama perintah nengeri ti chukup manah.
“Enti nadai kerejasama perintah nengeri udah tentu SPRM Sarawak enda ulih ngayanka penyulut.
“Lalu asil ari tu mega kitai ulih meda baka ni Sarawak iya nya sebuah nengeri ti maju, dalam pemaik enggau pengelantang sereta nadai mayuh penanggul makai suap,” ku iya seraya madahka opis nya deka majak ngemuntan sereta mutarka penanggul makai suap di nengeri tu.
Berebak enggau tu, Azam mega madahka diri dulu ari nya bisi nemuai meri basa ngagai Kepala Menteri enggau Sekretari Perintah Nengeri, enggau tuju nerangka chara SPRM enggau ejensi perintah ulih besaup ngangkatka integriti pengereja pengawa opis perintah di Sarawak.
Iya bepenemu, kerejasama ari semua kelebih agi rmensia mayuh enggau ejensi perintah di nengeri tu beguna dikena amat neruska pemansang sesebuah nengeri enggau menua.
Kelimpah ari nya, lebuh ke ngenang pasal Direktror SPRM Sarawak ke baru iya nya Ketua Penulung Kanan Komisioner Razim Mohd Noor, Azam arap bendar Razim ulih ngiring SPRM Sarawak bepelasarka peneleba iya ke chukup mayuh.
“Aku arap bendar ngena peneleba iya ke chukup mayuh, (Razim) ulih mantu matau enggau nagang penyalah makai suap enggau ulih nyaga integriti di Sarawak,” ku iya lebuh meri kelala direktor nya ngagai raban media.
Sama datai Sapit Direktor SPRM Sarawak iya nya Penulung Kanan Komisioner Zulhairy Zaidel enggau pemesai SPRM ke bukai.