PDP pechaya Subeng deka dipilih ngenanka sitak Saratok
SARATOK: Parti Demokratik Progresif (PDP) pechaya chalun tunggal sida deka dituku nyadi chalun ngetanka penuduk Parlimen Saratok ungkup Barisan Nasional (BN) maya Pengawa Bepilih Besai Ke-14 (PRU14) ti deka datai.
Kaban Kunsil Nengeri (ADUN) Meluan, Rolland Duat ti udah dipadu parti nyadi Direktor operasyen ungkup Saratok madahka bala ketuai tetinggi parti udah milih siku orang dagang, Subeng Mula nyadi chalun dipelaba ulih menang ari antara sida ti bisi ati.
“Semina Subeng aja dirintai PDP ngetanka Saratok lalu nama iya udah dianjung ngambi diperunding bala ketuai BN,” ku iya rambau program gempuru ketuai begulai enggau rayat di Rumah Bennet Buan, Ulu Risau, Krian apin lama ke udah.
Iya pechaya, nyadi peranak menua nya enggau ngembuan pelajar ditambah peneleba gawa dalam sektor perintah enggau peribit, Subeng ulih nangkup peminta ti dijuluk sereta dikedeka peranak Saratok, ku Rolland madah nyemetak.
Baka majoriti pengundi di menua nya ngayanka sukung tegap ngagai BN, Subeng patut nyadi pilih pemadu engkeman sida, ku Rolland, nerangka Subeng udah dipilih PDP, komponen BN ti udah dikeandal nyadi pemenggi penuduk Saratok.
Kenyau ari ditumbuh, PDP ( dulu suba SPDP) nadai kala puntan ngetanka penuduk Saratok ungkup BN nyengkaum rambau PRU sebedau tu lebuh penyandang mujur ngetan nyadi chalun parti.
Endang dikearapka chalun ari PDP deka diperunding nyadi chalun BN, Rolland minta peranak Saratok, kelebih agi penyukung BN ngambi gawa rat begulai nentu teulihka iya bulih pemujur.
Tuai Rumah Bennet Buan, ngarika urung 500 iku nyengkaum 50 iku tuai rumah ari kandang menua besemak ke bisi datai mantaika sukung sida ngagai chalun BN.
Antara bala bisi datai Ketuai Nembiak PDP Krian Kunsilor Jeffery Jimbun sereta bala ketuai PDP menua nya ke bukai.