Mayuh peluang disediaka perintah dikena mantu orang indu di menua tu
KUCHING: Nadai pengawa besiping ba orang indu di menua tu, ku Mufti Nengeri Sarawak Datu Kipli Yassin.
Iya madah mayuh macham peluang sereta bantu bisi disediaka perintah dikena mantu negapka orang indu di menua tu.
Ku iya, nya bepanggai ba orang indu nya empu milih sereta ngerebut peluang ti bisi disediaka kena negapka sida iya empu.
“Orang indu betuah endar ada di Malaysia laban ditu nadai sekat enti sida iya deka nyapai pemujur.
“Mayuh program ti digaga ulih Perintah nengah Opis Pemansang ke Orang Indu (Ruang bilik enggau Komuniti) kelimpah ari iya mega nyadi opis ke endang diungkup ke orang indu kena mantu negapka sida iya, nya alai rebut meh peluang nya kena negapka diri empu,” ku iya.
Iya madah munyi nya lebuh bejaku ba licha beserimbai enggau ‘Forum Rahsia Wanita Dalam Al-Quran’ ti diatur Opis Mufti Negeri Sarawak, Opis Agama Islam Sarawak (JAIS), Palan Penerang Islam Sarawak (IIC) enggau Tabung Baitulmal Sarawak di Auditorium IIC ditu, kemari.
Forum nya mega digulu ulih bini Kepala Menteri Da- tin Patinggi Datuk Juma’ani Tuanku Bujang begulai enggau Pemesai Esekutif ICC Zabariah Matali sereta sekeda pemesai bukai.
Ba jaku iya mega, Kipli madahka ke taun tu, opis menteri nya mega ngaga taun 2018 nyadi taun negapka orang indu.
“Tu mandangka bakani ku pemerat pengawa orang indu di menua tu, ke sama ngemansangka menua,” ku iya.
Ba atur pengawa nya mega, Pensyarah Kanan Opis Syariah enggau Undang-undang Akademi Pelajar Islam, Universiti Malaya Profesor Datin Dr Raihanah Abdullah madah, nasit orang indu di menua tu seruran dijaga sereta diintu enggau manah.
“Enti kitai meratika menua ke mayuh napi penyarut, ari pansik ke digaga aku lebuh ngelawa menua nya, mayuh orang indu enggau anak mit kena jamah sereta dikasar ninting hari dataika sida iya serutan takut belama.
“Gaya bansa tu nadai nyadi di menua kitai, alai kitai ulih diau enggau likun, orang indu peneka ati bejalaika pengawa sida iya, enda ibuh irau ati ke pengelikun sida iya empu,” ku iya.
Kelimpah ari nya, iya mega ngelalau orang indu enggau masuk gerempung ukai dipegai Perintah (NGO) ngambika sida iya ulih belajar sereta nemu hak orang indu.
Iya madahka agi mayuh orang indu ke napi penanggul ruang bilik, enda nemu hak sida iya empu kelebih agi bekait enggau belanja sereta hak sida iya ke bukai.
iya ngarap orang indu enda ngemuntangka pekara ke bekait enggau hak sida iya lalu seruran ngiga penemu ngambika enda nyadi mangsa penyarut ruang bilik.
Orang indu betuah endar ada di Malaysia laban ditu nadai sekat enti sida iya deka nyapai pemujur. Datu Kipli Yassin Mufti Nengeri Sarawak