Kes dadah: Polis nangkap empat saspek di Long Lama

MIRI: Polis Narkotik ari Indu Opis Kontingen Polis Diraja Malaysia (IPK) mujur nangkap empat iku orang nyengkaum siku indu lalu ngerampas dadah dipelabaka berega RM9,720 ba dua bengkah endur di Long Lama kena Hari Dua tu tadi.

Ketuai Opis Pengawa Pemansik Narkotik Nengeri (NCID) Supt Sahar Abdul Latiff ba siti penerang madahka, endur keterubah ke kena ipa raban polis, nangkap siku lelaki, 33, ke gawa nyadi mekanik di Pasar Long Lama dalam urung pukul 2.30 ngalih hari ensana.

“Kami bisi dipadahka mensia mayuh alai kami ngipa sebuah kerita ke nadai ngena lumur plat di Pasar Long Lama, lalu nangkap lelaki ke asal ari menua tu empu.

“Lebuh lelaki nya diperesa, kami nadai tetemuka sebarang utai tang peresa ke digaga ba bengkel nya tetemuka siti kambut plastik ke bisi dua iti tiup straw. Lalu dalam tiup straw nya gamal barang ke baka kristal, dipelabaka Syabu, lalu pemerat iya, dalam 5.2g,” ku Sahar.

Dadah nya dipelabaka berega dalam RM720.

Saspek lebuh diperesa mega, ditemu positif dadah Amphetamine enggau Methamphetamine.

“Polis benung mansik kes tu nengah genteran tusun ukum Seksyen 39A(1) Akta Dadah Mermabahaya 1952,” ku iya.

Ba lansa bukai, ipa kedua ti digaga polis ngeruga sebuah rumah ke nadai belumur di Kampung Kayan di Long Lama dalam urung pukul 3.30 lemai, lalu nangkap dua iku lelaki, berumur 30 enggau siku indu berumur 30 taun.

Kededua saspek nya sama enda gawa, lalu indu nya empu bekedai di Long Lama.

Lebuh meresa rumah nya, polis tetemuka 30 kambut plastik ke dipelabaka di isi enggau barang nyerumba kristal dipelabaka Syabu ditapuk dalam “Tupperware”, ke bisi dalam pemerat 62.7g, lalu dadah nya dipelabaka berega dalam RM9,000.

Polis mega ngerampas sebuah kerita 4WD ari siku ari saspek nya.

“Peresa ai kemi ba kededua lelaki nya ditemu positif Amphetamine enggau Methamphetamine, lalu saspek indu nya, negatif,” ku iya.

Polis benung mansik kes tu nengah genteran tusun ukum Seksyen 36B Akta Dadah Merbahaya 1952, ke ulih mai ukum sampai mati (enti ditemu salah).

Semua saspek nya udah dibai ngagai Palan Polis Miri (CPS) laban deka ditasat enggau silik agi.