Ari penyampau nya, 24 iku chalun peresa Sijil Pelajaran Malaysia (SPM) 2017 Sarawak bulih gred A+ dalam semua subjek

KUCHING: Sepenyampau 24 iku chalun peresa Sijil Pelajaran Malaysia (SPM) 2017 Sarawak bulih gred A+ dalam semua matapelajar.

Mantaika pemutus nya kemari, Direktor Opis Pelajar Sarawak, Rakayah Madon madah ari penyampau nya siku nembiak bulih 12A+, 5 iku bulih 11A+, 15 iku(10A+) enggau 3 iku bulih 9A+.

Nitihka penerang Rakayah, pemujur chalun SPM Nengeri Sarawak bepelasarka Gred Purata Negeri (GPN) ti majak manah iya nya ari 5.34 ba taun 2016 ngagai 5.17 ba taun 2017.

“Reti nya pemujur chalun SPM ungkup Nengeri Sarawak ba taun 2017 niki 0.17 ari Gred Purata Negeri,’ku iya ba Auditorium Opis Pelajar Nengeri di Jalai Diplomatik ditu.

Ungkup peresa SPM 2017 ku Rakayah nambah, penyampau 37, 092 chalun di Sarawak bisi ngerijista diri ngambi peresa nya.

Ku iya ari penyampau nya, 34, 183 tauka 92.16 peratus ngarika chalun Sekolah Menengah Kebangsaan, 361 iku (0.97%) chalun ari ejensi bukai kelimpah Opis Menteri Pelajar Malaysia, 1083 iku( 2.92%) chalun sekula pribit enggau 1,465 iku(3.95%) chalun ngatika kediri.

“Ari penympau nya, 28, 108 tauka 83.21 peratus ari 33, 778 iku chalun Sekolah Menengah Kebangsaan bisi datai ngambi peresa lalu mujur bulih setipikit SPM, iya nya pas subjek Bahasa Melayu enggau Sejarah.

“Ke pemadu beguna amat iya nya sida ke bulih setipikit minimum SPM majak nambah iya nya pas subjek Bahasa Melayu enggau Sejarah,’ku Rakayah.

Nengah pemutus SPM 2017, Rakayah lebuh dikerandau pengarang berita pechaya penuduk Sarawak enti dibanding enggau nengeri bukai deka majak manah.

“Bepelasarka pemutus ke manah tu, aku pechaya kitai ba penuduk 13 diatu laban Gred Purata Negeri niki.

“Enda mudah nyapai 0.17 laban kitai meseti nempa mayuh agi pelajar ke ngembuan kualiti,’ku iya seraya madahka ba taun ke udah Sarawak ba penuduk ke-15 ari semua 16 nengeri.

Angel Lai An Ge ari SMK Methodist Sibu nyadi chalun SPM 2017 Sarawak ke pemadu nyulut pengudah iya bulih A+ ba semua 12 subjek.

Tiga iku nembiak ari SMK Methodist Sibu mega bulih 11 A+ iya nya Cheong Kang Min, Cindy Ho Mei Jin enggau Delphina Tiong Ming Min .

Bela bulih 11A+ iya nya Chong Min Hui ari SMK Chung Hua Miri enggau Evelyn Lau Ming Yii ari SMK St Elizebeth Sibu.

Ba pengawa kemari, Rakayah bisi nyuaka setipikit basa ngagai 22 sekula ke bulih Gred Purata Sekolah ke baruh ari 4.0 ti diterima Prinsipal sekula nya.

Reti nya pemujur chalun SPM ungkup Nengeri Sarawak ba taun 2017 niki 0.17 ari Gred Purata Negeri. Direktor Opis Pelajar Sarawak Rakayah Madon