Bida ba pemujur chalun SPM 2017 di mengeri enggau pesisir majak semak
KUCHING: Bida pemujur chalun SPM 2017 entara sekula dalam kandang mengeri enggau di menua pesisir ungkup minimum Gred E ba subjek Matematik, Sains enggau Bahasa Inggeris majak semak, ku Direktor Opis Pelajar Sarawak Rakayah Madon.
Bejaku maya mantaika pemutus SPM 2017 di Indu Opis Pelajar Negeri kemari, iya madah bida ba subjek Matematik ba taun 2016 iya nya 8.39 peratus tang udah dirapitka agi ngagai 7.19 peratus ba taun 2017.
“Ungkup subjek Sains, bida ba taun 2016 iya nya ba ikas -1.78 peratus lalu diatu iya nya ba taun 2017 udah dirapit ngagai -1.38 peratus.
“Lalu pia mega ba subjek Bahasa Inggeris, bida dirapitka ari 12.24 peratus(2016) ngagai 11.84 peratus ba taun 2017,’ku iya.
Lebuh dikerandau pengarang berita pengudah pengawa, Rakayah madah engka sida ( nembiak di menua pesisir) ngasaika diri jauh lalu ketegal nya meseti bebendar agi belajar.
Ku iya, nadai bida ke nyata ba pemutus SPM 2017 tang ba subjek Matematik engga Bahasa Inggeris, bida majak semak entara nembiak dalam kandang mengeri enggau di menua pesisir.
“Ba sentang Sains, pemutus manah agi di menua pesisir, majak manah,” ku iya.
Ngenang kaul ke sama, Rakayah madah bisi 22 sekula sekondari di serata Sarawak nyapai pemutus ke nyulut iya nya Gred Purata Sekolah (GPS) 4.00 tauka baruh agi ari nya.
Sekula ke pemadu nyulut ku Rakayah iya nya Sekolah Menengah Sains Kuching Utara ti ngerikod ikas GPS 2.12, ditangkanka SM Sains Miri (GPS 2.17).
Kolej Datu Patinggi Abang Hj Abdillah,Kuching ngerikod GPS 2.49), SM Sains Kuching, Padawan( GPS 2.67), SMK Methodist, Sibu(GPS 2.84), Kolej Tun Datu Tuanku Hj Bujang, Miri(GPS 2.89). SM Sacred Heart, Sibu(GPS 2.98), SMK Agama Tun Ahmad Zaidi, Kuching (GPS 3.17).
SMK St Anthony, Sarikei ngerikod GPS 3.33, SMK Tinggi Sarikei(GPS 3.58), SMK Lutong Miri (GPS 3.63), SMK Kubong Limbang (GPS 3.68), SMK Agama Sheikh Hj Othman Abd Wahab Padawan(GPS 3.68).
SMK Sungai Merah, Sibu( GPS 3.77), SMK Bandar Sibu ( GPS 3.80), SMK Tung Hua Sibu( GPS 3.89), SMK Agama Miri( GPS 3.89), SMK Kwong Hua Middle Sibu(GPS 3.91), SMK Batu Lintang (GPS 3.94), SMK Tinggi Kuching(GPS 3.97) enggau Sekolah Seni Malaysia Sarawak (GPS 4.00).
Semua Prinsipal 22 buah sekula nya nerima Setipikit Basa ari Rakayah kemari.