Sukung renggat baruh ditegap ngambika BN menang besai ba PRU14
SIBU: Raban Nembiak Parti Pesaka Bumiputera Bersatu (PBB) deka ngenegapka sukung renggat baruh dikena nentuka Barisan Nasional ( BN) menang besai maya Pengawa Bepilih Besai Ke-14 (PRU14) di Sarawak.
“Batang tuju kitai iya nya kitai ngenegapka renggat baruh ari sukut pengawa beratika profil pemadah bala pengundi. Kami mega muka bilik operasyen ba semua pampang mit ngagai renggat pampang.
“Ba pekara tu, kami udah bisi chara baka ni naburka pemadah semanjai nya lalu udah sedia nyikap diri datai ba hari nyadi, raban nembiak ngaga poster enggau perengka pengangkut, bala kami udah sedia.
“Tu naka ke diatu laban kami enda nemu kemaya bepilih. Kami gawa begulai enggau raban Indu ngabas rumah panjai pengundi enggau ke bukai,” pia ku Ketuai Nembiak PBB Gerald Rentap Jabu madah ngagai pengarang berita pengudah malam nembiak zon tengah PBB ditu, Hari Lima tu tadi, ke mega digulu Menteri Muda Pelajar enggau Pansik Teknologi Dr Annuar Rapaee, ke lalu nyadi Mandal Presiden PBB, Kaban Kunsil Nengeri ( ADUN) Bukit Goram Jefferson Jamit Unyat, ADUN Machan Allen Siden Gramong, Temenggong Stanley Geramong enggau Sekretari Politik Kepala Menteri Tapah Ata.
Iya nyemetak nandu madahka kaban PBB nyengkaum raban nembiak enggau indu gawa begulai nentuka BN Sarawak menang maya PRU14 tu.
“Kami deka menang ukai semina ba penuduk Parlimen Sibu aja, tang mega ba semua sitak BN di Sarawak. Kami deka bebendar agi gawa nentuka BN menang besai maya PRU14,” ku Rentap, ke mega ADUN Layar.
Tambah iya, pekara ke pemadu beguna ngagai BN nengeri ngambika menang besai maya pengawa bepilih besai ti deka datai ngambika Sarawak ari baruh ketuai dipegai Kepala Menteri Datuk Patinggi Abang Johari Tun Openg, terang agi sada didinga minta mulai kuasa ngagai nengeri, kuasa ti enda sengaja udah majak lenyau ngelama tu.
Iya mansutka jaku tu lebuh ditanya pasal pengawa raban nembiak PBB nyediaka diri napi PRU14 ti deka diatur.
Ditanya senentang jaku iya ngambi pulai baru penuduk Parlimen Sibu, ku Rentap, ba penemu iya, nyema beratika isu ke bisi diatu, nama pekara ti udah dipadah DAP.
“DAP enggai nyukung Kepala Menteri kitai, tu pekara ti besai lalu Kepala Menteri kitai gawa negika hak Sarawak.”
Chairman pengatur pengawa Romeo Christopher Tegong, ke mega Sekretari Politik Kepala Menteri mega bisi bejaku ba pengerami nya.