Sekula ti kena ampuh bah balat endar rusak

KUCHING: Gaya sekula ke kena ampuh bah bulan siti nyin tadi udah balat endar rusak, lalu pekara nya bela diasaika menteri enggau raban iya lebuh ke ngabas sekula nengah palan bejalai kaki ti digaga ari kayu ke nyauka runtuh.

Menteri Pelajar, Sains enggau Pansik Teknologi Dato Sri Michael Manyin Jawong enggau raban iya udah ngabas buding ba SK Nanga Tau di Tatau kena ngalih hari Hari Tiga, ke alai sida tedinga bunyi kayu patah ti ngujungka palan bejalai kaki ti digaga ari kayu nya lalu singit deka runtuh.

Sida benasit amat laban palan bejalai kaki nya enda lalu runtuh ti ngujungka raban nya lalu berumban ninggalka mindah ngagai endur bukai ba sekula nya.

Menteri Muda Pelajar, Sains enggau Pansik Teknologi Dr Annuar Rapaee enggau nala pemesai ari opis m enteri nya enggau Opis Pelajar Nengeri udah nemuai ngagai SK Nanga Tau sehari nya, ke mega sebagi tusun program pejalai ngagai lapan buah sekula di pelilih tengah enggau utara Sarawak ke kena ampuh bah.

Kelimpah ari ngabas sekula, Manyin mega bisi ngungkupka belanja ti udah dipesetuju perintah besai enggau nengeri ng agai sekula nya dikena nyilih perabot ke rusak enggau ngemanahka sekula nya.

Ku Kepala Pengajar SK Nanga Kua Tuming Jipon, sekula nya didiri dalam taun 1965 tang struktur rumah sekula nya ke tebal agi kayu mengkang enda diganti ngelama tu.

Ku iya, sekula nya balat endar ampuh bah kena 7 ngagai 11 Februari ti ngujungka sekula nya ditutup dalam timpuh nya. Ujan bangat ke enda ngengetu udah ngujungka ai ari Sungai Kakus besai lalu ngampuh sekula nya.

“Ke sekali tu, bah besai nya enda disadang sereta udah ngampuhka sekula nya. Ssemina perabung rumah sekula aja ke enda ampuh.

“Ampuh bah nya udah ngujungka perabot dalam kelas enggau tilam dalam buding rusak. Struktur begunan nya mega rusak tang kami semina ulih nyilih gelegar buding ngena papan lapis ke sementara aja taja pan kami nemu papan lapis nya enda tan ditating utai ke berat.

“Sekula nya dibekal karan ngena injin api, tang ampuh ke nyadi apin lama udah ngerusakka injin api nya. Kami benasit amat sereta meri terima kasih laban sebuah kompeni peribit udah nganti injin api nya ngena ke baru,” ku Tuming.

Ku iya baru, pengudah berandau enggau bala apai indai, sia udah setuju mindahka sekula nya ngagai endur ke tinggi agi lalu palan nya udah di kelala.

Berebak enggau nya, gaya sekula SK Muput Tatau ke mega semak enggau Sungai Kakus balat agi rusak ti ngujungka sekula mengka ditutp pengudah ampuh bah lalu nembiak sekula nya dipindah besekula sementara ngagai SK Rh Barrau ti enda jauh ari nya.

Lebuh ke nemuai ngagai sekula nya, semina apai indai enggau nembiak sekula ti bisi ngelalauka penatai menteri enggau raban iya.

Dulu ari, Manyin bisi ngabas dua buah sekula di pelilih Selanga iya nya SK Nanga Selangau enggau SK Nanga Kua ke sama kena ampuh bah bedau lama.

Ba Nanga Kua, Kepala Pengajar Matu Ekum madah ngagai raban nya, sekula ti didiri dalam taun 1963 nya udah ditukuka Opis Kereja Raya (JKR) enda selamat agi dikena.

Ku iya, sekula ke ba tebing Batang Mukah suah kena ampuh bah, mayuh meri pengerugi laban perabot, perengka enggau wayar karan rusak.

Matu madah ngagai menteri, sekula nya udah minta dipindah ngagai endur ke tinggi agi lalu arapka nya ulih dipejalaika enggau lengkas.

Kepala Pengajar SK Nanga Selangau Bubong Janting mega bisi nyebut p asal perambu deka mindahka sekula nya ngagai endur ke tinggi agi laban endur k e diatu n y a suah ampuh bah. Iya mega madahka Gerempung Apai Indai enggau Pengajar ( PIBG) udah setuju enggau perambu nya.

Kena pagi Hari Empat, Manyin enggau raban iya begulai enggau sekretari mendam opis nya, Datu Sudarsono Osman bisi ngabas dua buah sekula ke majoriti nembiak Iban di utara iya nya SK Nanga Merit Limbang enggau SK Ulu Lubai.

Kededua buah sekula nya sama didiri ba tebing Sungai Lunai sereta sama kena ampuh bah. SK Nanga Merit Limbang tiga kali kena ampuh iya nya 19 ngagai 21 Disember taun siti nyin tadi, 25 ngagai 27 Januari enggau 5 ngagai 7 Februari.

SK Ulu Lubai, mega bisi kena ampuh bah penalam 10 kaki kena 20 Disember taun siti nyin tadi.

Ku iya dalam timpuh lebih 50 taun sekula nya udah didirika iya nya ba taun 1964, ampuh ke sekali tu mih ke pemadu balat.

“Ari ari Sungai Lubai jampat bah ti ngujungka kami enda nyelamatka berang enggau perabot. Pusat Sumber ke kala nerima gelar ke pemadu manah ba renggat pelilih menua enggau nengeri, mega rusak,” ku iya.

Ku Manyin kededua buah sekula nya, SK Nanga Merit Limbang enggau SK Ulu Lubai deka digembung nyadi sebuah sekula lalu belanja RM23 milion dikena ngaga sekula baru nya udah dikemendar lalu pengawa ngaga nya deka beremgkah taun tu.

Ku Iya baru, ungkup belanja ke diberi ngagai sekula dikena ngemanah sereta nganti perengka ke rusak ketegal ampuh bah nya semina sementara aja laban sekula ke b aru deka disikap enggau makmal sains sereta bilik komputer ngambika bala nembiak endur belajar ke manah agi enti nya udah tembu ila.

“Barang penyampau ungkup belanja ke diberi ngagai sekula ke kena ampuh bah nya, ke bendar nadai reti laban sekula nya deka kena ampuh bah baru ba renggat ke dudi ila. Nya alai, aku ngarapka sekula nya ulih dipindfah ngagai endur b aru tauka digempung nyadi sebuah sekula,” ku Iya seraya madahka belanja deka dipinta ari perintah bedsai dikena ngemujurka juluk nya.

Manyin enggau raban iya sehari nya mega bisi ngabas SK Long Sobeng ke majoriti endur nembiak bansa Kenyah enggau SK Long Jegan, ke majoriti endur nembiak bansa Berawan ke sama bela ampuh ke ai ari Sungai Tinjar bah.

Kepala Pengajar SK Long Jegan, Sami Bunda madahka sekula ti didiri dalam taun 1964 jarang amat dilawa menteri, ke alai iya berasai temegah enggau penemuai Manyin ti mandangka menteri nya beratka sekula di menua pesisir.

Siku apai nembiak di Long Sobeng, ngarapka perintah besai jampat agi ngemanahka sekula di menua pesisir laban lebih 50 taun udah enda dikeibuhka kenyau ari Menua Malaysia ditumbuh.