Tu dikena nentuka Barisan Nasional ulih menang besai di Sarawak
KUCHING: Komiti Raban Nembiak Parti Rakyat Bersatu (UPP) sepenemu bela deka meri sukung nadai bebagi ngagai semua chalun Barisan Nasional (BN) maya Pengawa Bepilih Besai Ke14 (PRU14) ti deka datai.
Sekretari Raban Nembiak UPP, Yap Min Su madah, tu dikena nentuka BN menang besai di nengeri tu.
“Nya alai, kitai sepenemu deka meri sukung ngagai semua chalun BN maya PRU14 tu ila.
“Kitai pechaya nengah prinsip penyerakup baka tu iya deka ngemujurka pemansang nengeri enggau menua,” ku iya rambau aum pengarang berita di Indu Opis UPP ditu kemari.
Ku Yap, komiti tu mega deka meri sukung ngagai Presiden kitai, Dato Sri Wong Soon Koh ngambika terus ngiring parti tu nyapai misyen enggau visyen pemansang dudi hari ti menyana agi.
“Kitai mega meri sukung tegap ngagai Menteri Besai Datuk Seri Najib Tun Razak enggau Sapit Menteri Besai, Datuk Seri Zahid Hamidi, nyakal jaku bula ti ditabur penyakal maya PRu14 tu,” ku iya.
Kelimpah ari nya ku iya, komiti tu mega mantaika diri taluk ngagai Tuai Pemegai Menua (TYT) Tun Pehin Sri Abdul Taib Mahmud ba pengawa iya ngetanka Sarawak nyadi nengeri lantang, likun enggau diau bebaik enggau 32 raban etnik pengelama 33 taun di baruh pegai iya.
“Kitai mega mantaika sukung enggau pengandal ngagai kepala Menteri, Datuk Patinggi Abang Johari Tun Abang Openg ti ngetuaika nengeri mansang ngagai mua ti manah agi sereta pengeran iya nempa nengeri tu ngagai ekonomi digital.
“Antara pengawa digaga iya (Abang Johari) iya nya ngemansangka infrastruktur enggau perengka guna moden baka Bank Pemansang Sarawak, Petroleum sarawak Berhad, Sistem Transit Aliran Ringan ( LRT) enggau ke bukai tentu deka meri pemaik ngagai rayat,” ku iya.
Berebak enggau nya, Yap ngenang jasa enggau meri terima kasih ngagai Menteri Besai ti udah nyamin deka meri hak ngagai Sarawak.
Nangkan Ketuai Nembiak UPP, Johnical Rayong ke lalu nyadi Kaban Kunsil Nengeri (ADUN) Engkili madahka raban Nembiak UPP bisi urung 30,000 iku kaban di serata nengeri enggau 7,000 iku di Engkilili lalu 1,400 iku di Batang Ai.
Kitai pechaya nengah prinsip penyerakup baka tu iya deka ngemujurka pemansang nengeri enggau menua. Yap Min Su Sekretari Raban Nembiak UPP