Sistem pelajar kemaya hari tu patut dinamik sereta progresif
BETONG: Sistem pelajar kemaya hari patut dinamik sereta progresif dikena sedia napi ubah seriris enggau ubah jeman.
Nya kebuah pangku pengawa pelajar udah berubah enggau nyata ari dulu suba ti nyeridi ngagai pengawa nyediaka orang gawa landik kelimpah nampung pengawa nyadi ketuai menua, nyadi modal mensia bepenemu sereta ulah ti menyana.
Kaban Kunsil Nengeri (ADUN) Engkilili Dr Johnical Rayong Ngipa madah berindik ari nya Opis Menteri Pelajar udah bejalaika Penilaian Berasaskan Sekolah (PBS) ti gawa nyadi penyukat kompetensyen nembiak.
“Reti iya, kitai patut nempa nembiak ti nyulut enggau kompeten iya nya nyapai standard kualiti dikena nyapai juluk menua,” ku iya.
Iya mansutka jaku nya lebuh bejaku bejadika ‘Hari Kualiti dan Sarana Ibu Bapa’ Kolej Vokasional Betong di Dewan Sri Kenanga kolej nya kemari.
Nya alai ku iya, bemacham pengawa patut dipejalai dikena nempa nembiak nyadi penyerungkai penemu lalu ukai semina nurut aja, pekara beguna endar dikena nyikap raban nembiak rebak baru enggau peminta abad ke-21.
“Ngelama tu kitai ngumbai kaul apai indai enggau pelajar bala anak di sekula nyadi bala selama.
“Ari ubah jeman sereta pemar kemaya hari begunaka pengawa begulai ti deka meri pemujur bala nembiak.
“Nyadi apai indai, kitai patut belematika diri empu sereta enda ngelempaika tanggungpengawa ngagai bala pengajar ngajar bala anak,” ku iya nerang.
Ku iya, juluk apai indai nganjung bala anak nampung pelajar ba pelajar vokasional nyadi pengawa ti manah nyaup perintah nempa mayuh agi orang gawa landik enggau jelan pengelandik datai ba taun 2020.
“Tu ukai pengawa ti masau hari laban penerang pemadu baru madahka bisi 79 peratus sida ti belajar kohort pertama Kolej Vokasional bulih kereja dalam industri tauka pengawa.
“Tambah mega, bisi 56 peratus ari sida udah nerima pinta diambi gawa maya agi dalam Latihan Industri tauka ‘On Job Training’ (OJT),” ku iya.
Pia mega Dr Rayong, tu nyenggala ngayanka nampung pelajar ba pelajar vokasional nyadi siti pengawa ti manah dikena nentuka bala nembiak bulih kereja setipak enggau pengelandik dikembuan sereta dikerindu pengudah tembu belajar jemah.
Ba lansa bukai, ku direktor kolej Lim Ah Juan, program sekali tu dikena ngenang penyulut dijapai bala nembiak dalam bidang dikaul sida pengelama ngiri penemu di kolej nya.
“Tu mega dikena meri peransang ukai semina ngagai bala ti nerima anugerah pagi tu (kemari), tang mega semua raban Kolej Vokasional Betong,” ku iya seraya nambah, tu mega meri penyedar ngagai bala komuniti ke alai diploma disedia kolej vokasional ukai kelas dua, tang sebaka enggau diploma ari palan pelajar tinggi enggau kolej bukai di menua tu.
Berebak enggau nya, Dr Rayong diberi basa nyuaka anugerah sereta limpang bejalai ngabas librari ti bisi rampa baru sereta ngemendarka geran Projek Mit Pemansang Menua Pesisir (MRP) penyampau RM10,000 dikena raban kolej bejalaika aktiviti sida.
Sama bisi datai pengari Direktor Bagi Pekara Pelajar Teknik enggau Vokasional Opis Menteri Pelajar Malaysia Dayang Normala Abang Dalhan, pengari Residen Betong Tang Sok Neo, Pemesai Pelilih Sofie Jebal enggau mandal Chairman Norila Gani.