Terabai Menua Pampang Miri nyuaka tulung ngagai ruang bilik niang Heather
MIRI: Bala kaban gerempung ukai dikuasa perintah (NGO) Dayak, Terabai Menua (TM) Pampang Miri, malam Hari Lima begulai nganjung tulung barang pemakai ngagai rumah nembiak indu primari lima, niang Heather Helda Tawi, ti bebadi nyawa ba sebengkah penusah bebadi di jalai alun di Permyjaya apin lama ke udah.
Raban diketuaika chairman sida, Wilfred Nassem enggau Ketuai Biro Pemadah Thomas Patrick, ngesah penusah rabat sida niang sebilik di rumah sida di Piasau Jaya Phase 2 seraya nganjung barang tulung.
“Kami ninga penusah bebadi tu lalu deka nyaup ngelempungka tating sida niang sebilik, nya kebuah kami minta bala kaban sereta orang bukai ti gerah jari besaup meri barang pemakai ngagai sida sebilik,” ku Thomas.
Barang pemakai nyengkaum berau, ai irup, ruti, kupi, gula, sayur, dagin enggau barang diguna ke bukai.
“Kami ngarapka tulung tu ulih ngelempungka tating penusah sida lebuh betapi enggau penusah tu,” ku iya nambah.
Seraya kaban TM ke bukai bisi bejalai ngabas sepintu bilik di Niah ti udah ditinggal midang siku ari sida sebilik.
Raban nya diuluka kaban sida, Linus Eken enggau Roys Akat ngabas Jinap Apah sebilik ti udah midang apin lama ke udah ketegal sakit, nyuaka tulung sereta mega bantu barang pemakai.
Nitih ku penyanding penemu TM Mark Jenggo, tulung mimit ari pupu bala kaban enggau sida ti gerah jari mantu ngelempungka tating penusah ditapi sida niang sebilik.
Ba lansa bukau ku Thomas, TM seruran sedia mantu ruang bilik seranta serata Miri, kelebih agi sida ti ditinggang penusah pemati ba diri sebilik.
“Kami ulih nulung ruang bilik seranta ngulihka larung tauka servis ngintu pemati. Pekara ti patut digaga sida meseti madahka kami,” ku iya.
Mensia mayuh ti deka minta bantu ngagai TM tau telefon nuju Thomas ba lumur 0128568565.