Program STUD nerima timbal manah ari bala ketuai renggat baruh
MUKAH: Program latih Setipikit Tadbir Urus Desa (STUD) ti diatur Opis Menteri Pemansang Menua Pesisir enggau Kandang Menua (KKLW) udah ngayanka pangka manah ngagai bala ketuai renggat baruh.
Timbal ari bala pesereta kus baka bala ketuai Komiti Pemansang enggau Pengelikun Genturung Pendiau (JKKK) enggau bala ketuai genturung pendiau ngayanka sida dekaka program nya dikerembai sereta chakah agi dipejalai.
“Timbal baka tu diperatika kitai nunjukka kus tu diterima manah. Tentu mega lebuh sida nerima manah endang sida ngasaika udah bisi pangka iya,” ku Sapit Menteri Pemansang Menua Pesisir enggau Kandang Menua, Datuk Alexander Nanta Linggi.
Iya dirandau pengarang berita pengudah Pengawa Nutup Program Sijil Tadbir Urus Desa INFRA-UniKL Zon Sarawak dipenyadi Menteri Pengintu Penge- lantang Pendiau, Komuniti, Indu, Ruang Bilik enggau Pemansang Anak Mit Sarawak Datuk Seri Fatimah Abdullah ditu, ensana.
Nanta dipinta ngelansa pasal kus tiga hari ti digulu 350 iku ketuai JKKK sereta bala ketuai genturung pendiau ari sitak Parlimen Tanjung Manis, Parlimen Igan enggau Parlimen Mukah.
Ku iya, kus ngatur pengawa nyadi siti agenda nasional KKLW ti diseriris enggau agen Transformasyen Menua Pesisisr opis menteri nya dikena nambahka pengelandik ngatur pengawa menua sida ngagai bala ketuai JKKK.
Sepenyampau 4,127 ketuai JKKK ari serata menua udah ngulu kus nya taun nyin tadi lalu deka ditampung taun tu enggau tagit 5,000 iku ketuai genturung pendiau enggau rumah panjai di Semenanjung, Sabah enggau Sarawak.
Latih nya ku iya nyadi siti9 chara perintah mantu rayat di menua tu kelebih agi di menua pesisir kelimpah bejalaika pemansang perengka guna.
Penau nyadi ketuai JKKK ku iya ti nyadi agen perintah sereta sida patut bejalaika pangku pengawa diri enggau meruan kelebih agi meri penyedar ngagai rayat di genturung pendiau ke alai perintah ke bisi diatu deka seruran gawa meri pengelantang idup ngagai rayat. — Bernama MARUDI: Urung 70 iku pengereja pengawa kaunter ejensi perintah tauka River Outrech Program ( ROP) nyereta program ruang bilik iru rumah panjai ba sepanjai Sungai Baram.
Pengereja pengawa ari ejensi perintah besai enggau nengeri ke ngambi bagi iya Opis Perbendaharaan Malaysia Sarawak ( PMS), Bomba, Opis Pengerejister Bansa (JPN), PDRM, Raban Soldadu Malaysia (ATM), Opis Pengintu Pengelantang Pendiau Raban Bansa, Opis Residen Miri, Opis Pelilih Telang Usan, Marudi enggau ke bukai.
Program ROP Sungai Baram ukai semina dipejalai ba siti endur aja, tang iya deka mindah ari siti endur ngagai siti endur ngena bot ekspres ngelawa raban ke diselinting.
Bisi enam palan penyangkai program tu iya nya ba rumah panjai di Long Lama, Uma Akeh, Long Puak, Long Banyok, Long Ikang, Long Sibong, Kuala Tutoh enggau Pengelelayan.
Pemesai Pekara Wang Perintah Besai Perbendaharaan Malaysia Sarawak, Mohd Saiful Sungkih Abdullah madah, pengereja pengawa ke nyereta program ruang bilik iru sekumbang program berengkah 2 nyentuk 8 Macrh.
Kenu ku iya, program ruang bilik iru dipejalai dikena nempa kaul enggau peranak rumah panjai ke alai ngetu sekumbang program diatur.
“Pengawa meri perais pengaga ati ngagai ruang bilik iru kelai tepa ulih sereta dikena mantu nyungkak penatai pemisi peranak menua laban jalai seduai dh ngelaban arus,” ku iya.
Kenu ku iya, ROP Sungai Baram ke ngena bot ekspres nyadika palan kaunter mindah kin kitu sereta dikena ngenataika penerang perintah ngagai rayat ba genap penyangkai ke udah dipilih.
“Rumah panjai ke besemak alai bot ekspres ngetu deka nyadi palan stesyen ngenataika penerang sereta servis perintah ungkup mensia mayuh di menua nya,” ku iya.
ROP Sungai Baram diatur Perbendaharaan Malaysia Sarawak (PMS), Opis Menteri Wang Malaysia bekerejasama enggau Raban Soldadu Malaysia (ATM) enggau Perintah Nengeri Sarawak nengah Opis Residen Miri, Opis Pelilih Telang Usan enggau Opis Pelillih Marudi.
Entara servis ke bisi dipejalai iya nya meresa pengerai, meresa ngeli, meresa optometrist (mata) ari Raban Soldadu Malaysia (ATM).
Ditangkan enggau Opis Pengerejista Bansa ( JPN) ti nyendiaka servis nukar surat beranak enggau tingki sereta sebarang pengawa ke bekaul.
Iya madah, peranak sepanjai Sungai Baram tebal agi bansa Orang Ulu enggau Iban lalu penyampau sida urung 4000 iku ari enam buah rumah panjai ke alai ngemujurka ROP.
“Batang pengawa peranak menua tu bejalaika pengawa bumai, bekebun enggau berikan,” ku iya.
Iya ngarapka, pengawa enggau inisiatif piak perintah nya ulih meri pemaik ngagai peranak Sungai Baram seraya nerang ngagai sida servis-servis ke bisi disediaka perintah nengah ROP.