Projek BALB nadai kaul enggau PRU14, ku Paulus

LIMBANG: Kereja nyambung batang paip Bekal Ai Menua Pesisir (BALB) ari simpang Ukong ngagai Medamit beungkus RM11 juta ti benung dipejalai nadai kaul enggau Pengawa Bepilih Besai Ke-14 (PRU14).

Kaban Kunsil Nengeri (ADUN) Batu Danau Paulus Palu Gumbang madahka pejalai projek nya udah diperambu sebedau Pengawa Bepilih Kunsil Nengeri (PRN) nyin tadi.

Ku iya, kereja nyambung paip dipejalai pengudah randau pasal belanja diputus enggau kunteriktor.

“Bisi jaku ti didinga aku ari sekeda raban nadai tanggungpengawa ke alai paip disambung ngagai sitak Ukong ngagai Medamit ketegal pengawa bepilih enda lama da agi.

“BALB ti dipejalai di Medamit iya nya perambu kitai sebedau PRN suba,” ku iya rambau Pengawa Ny- uaka Bantu Rayat 1Malaysia (BR1M) di Balai Medamit ditu, kemari.

Sama bisi datai pengari Kaban Parlimen (MP) Limbang Mohd Nur Faris Hasri, Pemesai Pelilih Limbang Jamalie Busri, Pemancha Nicholas Buyok Pura rnggsu Pemancha Willie Marum.

BALB nyadi projek di baruh perintah nengeri enggau ex-Kepala Menteri niang Pehin Sri Adenan Satem udah ngemendarka agih belanja BALB penyampau RM5 juta ari simpang Ukong ngagai pasar Medamit.

Taja pia ku Paulus, pengudah diserenih baru, bisi tambah ba belanja ungkup projek nya enggau kesemua penyampau manggai RM11 juta laban iya nyauka mungkur semua kandang menua enggaui simpang besemak.

Ku Paulus nambah, perintah mega ngelala 10 jalai ti nyambung genturung pendiau di sitak Batu Danau di baruh Opis Kereja Raya (JKR) deka diserah ngagai raban Cahya Mata Sarawak (CMS) ba pengawa ngintu.

Taja pia ku iya, agi bisi sebagi ari jalai nya bedau diserah ngagai CMS ngambika diangkat manah.

“Musim pengujan enggau gaya hari enda tentu ujung taun nyin tadi ngujungka mayuh jalai rusak lalu patut diseleti seraya kitai andal pengawa ngintu ulih dipejalai enda lama agi,” ku iya.

Kandang diatu, CMS benung ngintu Jalai Buang Ubur enggau Tanah Merah Medamit.

Ngelansa pasal BR1M, ku Paulus, iya nyadi pengawa perintah mantu ngelempungka tating rayat napi belanja idup ti niki.

Berebak enggau nya, sepenyampau 507 penerima ngaul mata duit RM252,000 nerima baucar BR1M sida empu.