Tu nyengkaum nyendiaka kus anak kapal, pengemudi enggau ke bukai dikena ngisi pengawa puang dalam industri tasik di Sarawak
KUCHING: Opis Menteri Betanam Betupi Moden, Tanah Adat enggau Pemansang Kandang Menua Sarawak deka nyendiaka bemacham kus pengelandik nyengkaum latih nyadi anak kapal, pengemudi enggau deriba injin, pemukat enggau juragan ngambika ulih dikena ngisi pengawa puang dalam industri berikan tasik di nengeri tu.
Sapit Kepala Menteri, Datuk Amar Douglas Uggah Embas madah perintah deka bekerejasama enggau Ejensi Penerit Adat Maritim Malaysia ( APMM), Opis Berikan Tasik Malaysia, Opis Pemansang Pengawa Berikan Malaysia enggau Komiti Latih Betanam Betupi Nasional ngambi matih raban nembiak ti bisi ati ngaul diri dalam industri nya.
Nitih ku iya, industri berikan ulih nempa pengawa puang menua baka nginjin pemakai tasik, dagang temuai enggau serak modal mensia ungkup raban nembiak ti bisi ati.
“Sebedau tu, kitai bisi palan latih di Tanjung Manis ungkup tuju pengawa tu, tang enda mujur matak mayuh nembiak nyereta iya lalu udah nya ngaul diri dalam pengawa berikan tasik dalam.
“Nya alai dikena mutarka penanggul tu, APMM Wilayah Sarawak merambu modal baru ngambika dipejalai ke alai sida nyediaka perengka guna ditu (Kompleks Maritim Tun Abang Salahuddin) nyadi palan latih.
“Kitai ba opis menteri nerima manah inisiatif tu lalu ngansak raban nembiak ngerebut pemanah awak tu ngaul diri dalam industri berikan tasik dalam ti tau mai penguntung,” ku iya lebuhka dirandau pengarang berita pengudah bejadika pengawa Baris enggau Hari Terbuka
Kitai ba opis menteri nerima manah inisiatif tu lalu ngansak raban nembiak ngerebut pemanah awak tu ngaul diri dalam industri berikan tasik dalam ti tau mai penguntung. Datuk Amar Douglas Uggah Embas Sapit Kepala Menteri Sarawak
beserimbai enggau Ngintu Genap Taun Ke-13 Maritim Malaysia Renggat Wilayah Sarawak ditu, kemari.
Menteri Opis Menteri Betanam Betupi Moden, Tanah Adat enggau Pemansang Kandang Menua nya madah, Sarawak kaya enggau pemansut tasik iya lalu dataika diatu, lebih 120 lisin berikan tasik dalam udah dikeluar ngagai pedagang.
Taja pia ku Uggah, penanggul besai ditapi nengeri tu iya nya ari sukut kurang peranak menua tu ngaul diri ba bidang tu nyadi anak kapal, juragan, pekereja mukat enggau ke bukai.
“Belalauka penerang diterima aku, nadai mayuh peranak menua tu rindu kereja dalam industri tasik dalam, dibida 90 peratus bepanggai ngagai peranak luar. Nya alai ari pemisi palan latih tu ila, deka nyadi awak pemadu manah ngagai bala nembiak ngaul diri dalam bidang tu,” ku iya seraya madahka program latih tu deka berengkah diatur dalam bulan Jun taun tu di APMM Wilayah Sarawak.
Ba lansa bukai, Direktor Maritim Wilayah Sarawak, Laksamana Pertama Dato’ Ismaili Bujang Pit berkata, APMM Wilayah Sarawak sedia nyediaka semua perengka guna latih ti bisi di Kompleks Maritim Tun Abang Salahuddin (KOMTAS) ngambika nyadi palan latih.
Antara perengka guna ku iya nyengkaum padang kawat, bilik belajar, bengkel mekanikal, bengel pukat, pegung enggau mess pemesai enggau raban ti tau nampung 100 pelatih sekali renggat.
“Kitai mega bisi nyediaka pakej ngaul kapal ti dirampas ngagai opis menteri bekaul ngambika nyadi kapal latih ungkup raban nembiak kitai ti bisi ati. Kitai ngarapka ari pemisi inisiatif tu, iya deka mantu perintah ngerembaika agi sektor berikan tasik dalam di nengeri tu,” ku Ismaili nambah.