Raban media napi mayuh pemar nyaup ‘ngemetulka’ berita pelesu

MIRI: Pangku pengawa raban media besai kemaya hari napi mayuh agi pemar kelebih agi ba pengawa nyaup ‘ngemetulka’ penerang berita pelesu dikerembai nengah chara ‘online’.

Datuk Bandar Miri, Adam Yii Siew Sang madahka tebal agi berita pelesu tu ulih ngasuh saru penemu sereta rayat begedi ati.

Ku iya nambah, raban media besai mega betapi enggau petenah sereta berita pelesu kelebih agi ba media alternatif.

“Enda dikenggai tu endang pemar besai ngagai raban media.

“Tu ari pengelemi rayat enda bejimat tauka nyerenih pengamat berita ti ditabur nengah media rama,” ku iya rambau Pengawa Ngenang Jasa Media malam kemari.

Beambika chunto isu pen- gawa muai uras di taba enda dikemendar, ku Adam, pengarang berita mega tau beambi ulih mejah perintah menua ba isu nya.

Taja pia, sida enda ngereja pengawa bansa nya tang ngenataika isu nya ngagai MBM lalu meri penyedar ngagai komuniti besemak.

Ku Adam nambah, raban sida mega bejalaika pengawa meresi endur nugungka uras nadai pemendar di beberapa kandang menua di Miri.

Taja pia ku iya madah nyemetak, rayat patut ngetuka ulah bebuaika uras di taba enda dikemendar sereta nyaga pemeresi di genturung pendiau sida.

“MBM seruran komited nyediaka servis pemadu manah ngagai rayat lalu mutarka sebarang penanggul ke bisi nyadi,” ku iya nerang.

Berebak enggau nya, Komiti Besai mega patut nyadi mata enggau pending ngenataika penerang beguna ngambi diperatika MBM.

“Enti uras enda diambi nitihka jam ditetap tauka babas enda ditebas, sida tau ngenataika sebana terus ngagai kitai ngambi atur patut jampat dipejalai,” ku iya.

Ba lansa bukai, lebih 50 iku pengarang berita enggau tukang gambar ari bemacham ejensi dirami rambau pengerami malam kemari.

Sama bisi datai Sapit Datuk Bandar Julaihi Mohamad, Chairman Pengatur Kaunselor Kueh Chie Tiong, Chairman Serakup Pengarang Berita Wilayah Utara, Andy Jong sereta bala kaban kaunsil mengeri bukai.