Lebih 300 rumah panjai udah ditiki James dikena ngaul rayat
SIBU: Dr James Chella udah niki lebih 300 buah rumah panjai di Saratok, Kalaka enggau Kabong dikena iya nyemakka diri enggau rayat ba Parlimen Saratok kenyau ari taun 2016 suba.
Iya siku ari raban Parti Progresif Demokratik (PDP) endang udah ditemu mayuh ngembuan juluk ati deka bediri ba penuduk nya.
Pengeransing iya tu tampak dipeda ari pengawa iya ti berundang ari Lawas ngelawa Saratok ngatur program begulai enggau rayat ba menua nya ninting ujung minggu.
Kebuah pia laban Dr James endang bisi kelinik iya empu di Lawas kelimpah sebuah agi di Sipitang, Sabah.
Kilah ensana, iya mega bisi ngatur program begulai enggau rayat ba Rumah Belang, Ensawa, Krian, Saratok.
Program iya tu bela digulu Chairman PDP Kabong Kaunsilor Rabaie Sulai, Sapit Sekretari PDP Saratok Bunyau Kasa enggau Tuai Rumah Belang empu.
Bunyau ba jaku iya maya tu madahka Dr James ransing betemu enggau rayat Parlimen Saratok sepengudah ti bisi ati bediri nyadi chalun ari PDP maya Pengawa Bepilih Besai Ke-14 (PRU14) ti deka datai.
“Ketegal nya, bepun ari taun 2016 suba iya udah berengkah bejalai lalu diatu iya endang dikelala amat rayat ditu.
“Nyentuk ke diatu urung 342 buah rumah panjai udah ditiki iya,” pia ku iya madah maya nya.
Kelimpah dikelala raban bansa Iban, pengeransing Dr James mega dipeda bala pengundi bansa Melayu.
Nya alai, ku Kaunsilor Rabaie, nyauka semua raban bansa Melayu di Kabong andal amat Dr James ulih dipilih nyadi chalun PDP bediri serak PRU tu.
“Kitai arap amat iya dipilih nyadi chalun ari Barisan Nasional (BN) lalu kami (rayat) mega deka bebendar nyukung ngambika iya deka mujur sebedau nyadi pengari rayat ba Parlimen Saratok udah ila,” ku iya madah.
Ari sukung rayat ngagai iya, Dr James ba jaku iya maya tu madahka diri berasai temegah ati laban rayat di Saratok rindu ke iya nyadi chalun sida ba PRU14.
“Semaya aku ti deka bebendar gawaka rayat di Saratok semampai ditanggam lalu deka dipenyadi nyema mujur udah tu ila,” pia ku iya madah.