Lebih 100 nyereta program betanam betupi ba Rh Bluda, Nanga Stapang
SIBU: Lebih 100 iku penyereta ari empat buah rumah panjai ditu ngambi bagi ba Program Pertanian Separa Moden Di Kawasan Luar Bandar 2018.
Sida tu iya ari Rumah Peter Sayong, Jalai KJD Durin Kanan, Rumah Donny Kujat, Sungai Majau, Kanowit, Rumah Bluda@Beluda Nabauk, Nanga Setapang, Sungai Majau, Kanowit enggau Rumah Michael Sumping, Sungai Majau, Kanowit.
Program tu diatur begulai Persatuan Penduduk Komu- niti Sibu Jaya enggau Empire Agrotech, Husbandry & Food Industries Company.
Ba program tu, bala penyereta deka diberi bantu baka leka benih, beg plastik enggau kibung sayur (nyema patut dikena).
Nitihka dipadah Direkter Operasyen Empire Agrotech, Husbandry & Food Industries Company, Rahimzul Helmie Hamdan, program ti deka dipenyadi ujung bulan April tu ngembuan tuju deka ngembing bala penyereta belajar nanam sayur ngena chara moden ba menua pesisir.
“Taja pan baka nya, kitai semina milih bansa sayur ke laku dijual aja ba program tu,” pia ku iya madah maya ba program Komuniti Datai Nemuai ba Rumah Bluda@ Beluda Nabauk, Nanga Setapang, Sungai Majau, Kanowit, empai lama tu tadi.
Bela datai maya program tu iya nya Direkteter Empire Agrotech, Husbandry & Food Industries Company Jocky Jim Ungka.
Iya madah, piak kompeni iya deka nyaup nyual asil tanam bala penyereta ngagai ejensi tauka kompeni ke dipilih.
Ku iya, tu deka ngemuntangka bala penyereta ari ke nyual asil tanam sida baka ba tamu.
Kelimpah ari piak sida, iya madah, asil tanam tu mega deka dibeli terus Persatuan Penduduk Komuniti Sibu Jaya ti datai ngelawa rumah panjai bala penyereta.
Program tu bela disukung Iban Agriculture Of Sarawak (IAS).