Komuniti di menua pesisir udah ngasaika mayuh macham ubah sekumbang Najib nyadi PM
SONG: Mensia mayuh ke diau ba menua pesisir di Song diatu udah ngasaika macham ubah kenyau Datuk Seri Mohd Najib Tun Razak nyadi Menteri Besai (PM) ari taun 2009.
Kaban Parlimen (MP) Kapit Datuk Alexander Nanta Linggi madah, ubah tu bepun ari Najib endang ngemeratka pengidup rayat di menua pesisir ti agi napi penyuntuk.
“Ba pengelama semilan taun tu, udah Najib nyadi Menteri Besai, macham bengkah ubah digaga perintah lalu diasaika rayat menua pesisir ditu.
“Kitai mega meda mayuh udah belanja diungkupka ngagai rayat ba nengeri tu,” ku iya.
Nanta mantaika jaku nya maya Program Pemesai Begulai Enggau Komiti Pengelikun enggau Pemansang Genturung Pendiau (JKKK) Sungai Tekalit, Katibas, Song, hari Enam tu tadi.
Iya ti mega Sapit Menteri Pemansang Menua Pesisir Enggau Kandang Menua madah, di Tekalit bisi 19 buah rumah panjai, bela udah nerima macham bengkah projek mit ti semua iya beungkus RM2.4 juta dalam timpuh 2016-2017.
Tu ku iya, bisi bebida enggau maya pegai Menteri Besai ke suba iya nya Tun Mahathir Mohamed ari 1981 nyentuk 2003 ti maya nya mega tiap iku Kaban Parlimen semina diungkupka RM300,000 aja setaun dikena ngemansangka parlimen ke dipegai sida.
Penyampau nya ku iya enda chukup dikena ngemansangka menua pesisir di Kapit ke chukup besai.
“Pia mega apai (Tan Sri Leonard Linggi) maya nya ti nyadi Kaban Parlimen Kapit kala mai Tun Mahathir nemuai ke Engkuah dalam taun 1982 ngena helikopter ngambika iya meda kediri empu gaya pengidup rayat di menua pesisir.
“Maya nya rayat semina minta sebuah klinik mit enggau siku lutor lalu disetujuka Tun Mahathir tang nyentuk iya badu nyadi Menteri Besai peminta ke mit nya empai ulih dipenyadika iya,” ku iya lebuh ngenang pasal pekara nya.
Kelimpah ari nya ku Nanta, Ketuai penyakal Datuk Seri Anwar Ibrahim maya ke nyadi Menteri Pelajar dalam taun 1986-1991 mega enda mujur mai ubah pemansang ngagai sekula di menua pesisir Sarawak.
“Seduai iya maya nya megai kuasa pemadu besai di menua tu tang nama kebuah seduai enda tebaika mayuh ubah pemansang ngagai kitai di menua pesisir. Kita empu ulih mida sereta meda bida tu.
“Mayuh jaku petenah diberi ngagai Najib ketegal ti deka ngelabuhka perintah Barisan Nasional (BN) taja BN udah tampak mai pemansang enggau ubah ngagai kita,” ku iya.
Nanta ti mega mangku pengawa nyadi Sekretari Besai Parti Pesaka Bumiputera Bersatu (PBB) ngelalau rayat rumah panjai di Tekalit anang alah jaku politik penyakal lalu pajakka nyukung pegai BN ngambika nengeri tu kelebih agi di menua pesisir semampai ulih dikemansangka nyentuk ke jemah ila.