Pekara bekaul tanah NCR deka dibantai ba DUN bulan Julai tu ila

MARUDI: Sapit Kepala Menteri, Datuk Amar Douglas Uggah Embas madah isu bekaul tanah Adat Bansa Asal (NCR) enggau Kanun Tanah Sarawak deka dibantai dalam Aum Kunsil Nengeri (DUN) dalam bulan Julai ti deka datai.

Uggah ke mega Menteri Betanam Betupi Moden, Tanah Adat enggau Pemansang Kandang Menua madahka isu nya udah diputar lalu udah bisi pemutus jaku deka dibantai maya DUN Mei tu ila.

Taja pia ku iya, ketegal aum dilanjar ngagai bulan Julai, dikena meri awak Pengawa Bepilih Besai (PRU) ti dipelaba deka diatur dalam bulan Mei, nya alai pengawa mantaika ubah mega dilanjar ngagai bulan Julai.

“Kitai deka mantaika ubah Kanun Tanah tu maya DUN Julai tu. Aku andal kitai ulih ngatur maya nya laban tu mih komitmen kitai.

“Kandang diatu, kitai dalam renggat kepenudi ngemaruka ubah nya,” ku iya madah ngagai pengarang berita, lebuhka dirandau pengudah bejadika Program Pemesai Begulai Enggau Rayat di Rumah Penghulu Benang Pilang, Sungai Bakas Atas, Bakong, Hari Minggu tu tadi.

Rambau program nya, Uggah mega bisi ngemendarka geran ngagai Komiti Pemansang enggau Pengelikun Genturung Pendiau (JKKK) Rumah Benang penyampau RM30,000 seraya RM5,000 diberi ngagai Biro Indu rumah panjai nya.

Seraya Kaban Parlimen ( MP) Baram, Anyi Ngau ngemendarka geran Projek Mit Pemansang Menua Pesisir (MRP) penyampau RM20,000; Menteri Muda Industri enggau Beranakka Puku, Malcom Mussen Lamoh ngemendarka RM10,000 enggau Sapit Speaker DUN, Datuk Gerawat Gala mega bisi ngemendarka RM5,000 ungkup Biro Indu Rumah Benang.

Sama bisi datai Menteri Muda Kaunsil Kandang Menua, Datu Dr Penguang Manggil, ADUN Telang Usan, Dennis Ngau sereta ADUN Layar, Gerald Rentap Jabu.

ANGKATKA TIKAS EKONOMI: Fatimah (lima kanan) begambar kenang begulai enggau bala pengatur enggau pesereta SWAG ditu.

UNGKUP KITA: Uggah (empat kiba) nerima tepa ari Penguang, seraya dikemata bala temuai dipebasa bukai.