Jamit udah ngemataka pengawa nyuaka bantu ngagai apai Emily Bunut
KAPIT: Kaban Kunsil Nengeri ( ADUN) Bukit Goram Jefferson Jamit Unyat apin lama ke udah bisi ngemata pengawa nyuaka kereban ‘Braille’ iya nya sistem tauka kereban dikena nulis ti ditengkebang Louis Braille, ngagai Philip Anak Andah, apai Emily Bunut.
Emily Bunut, 11 taun, pengkuan ari lima iku anak Philip Andah enggau Pohami Beramong ari Rumah Bengau, Nanga Sut, Baleh ditu.
Emily iya nya siku nembiak nyelai pendiau, buta sepiak. Lebuh di Kapit, iya kala ngerejista diri ba Palan Pengerai Dalam Komuniti (PDK) lalu ketegal iya ulih belajar, PDK nyukung iya belajar di sekula khas di Kuching kenyau ari taun nyin tadi.
Presiden Kelab Lion Kapit, Ting Bee Eng udah nyuaka Braille ngagai Philip di Hotel Meligai seraya dikemata Jamit enggau bala kaban kelab ke bukai.
“Dulu ari tu lebuh aku ngabas PDK Kapit dalam taun nyin tadi, udah nya ngatur randau enggau bala kaban komiti kelab Lion ditu, sida mantaika isu Emily minta bantu ari aku mantu meli Braille tu. Aku setuju lalu meri duit ngagai kelab ungkup pengawa tu lalu Braille beungkus RM3,800,” ku iya.
Seraya apai Emily, Philip enggau indai iya, Rohami meri terima kasih ke pengerah jari enggau jasa Kelab Lions Kapit enggau PDK ditu mantu anak indu sida ke diatu benung belajar di Kuching.
“Datai ari Rumah Bengau, Nanga Sut, Baleh. Kami bisi lima iku anak. Emily tu pengkuan bisi timpang pendiau. Menyadi iya ke bukai nadai ngawa. Kami meri terima kasih ngagai Jamit ti udah gerah jari meli Braille, pia mega ngagai raban Kelab lion enggau PDK ti udah mayuh mantu Emily,” ku Philip.
Sama bisi datai Sekretari PBB Bukit Goram Edward Manggah, Penulung Jamit Cochan Alwi, Dato Yong Hua Sying, Kunsilor Jenny Yii, Sng Geok Yien, Amy Teo, sereta bala bukai.