Program ti digaga serata nengeri tu dikena nentuka pun rian ngasilka mayuh buah rian, bekualiti tinggi
KUCHING: Opis Menteri Betanam Betupi Moden, Tanah Adat enggau Pemansang Kandang Mengeri nengah Opis Betanam Betupi Sarawak ngatur Program ‘Durian Rehabilitation’ ba serata nengeri, berengkah bulan April 2018.
Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Mengeri Datuk Amar Douglas Uggah Embas madahka, nya sebengkah inisiatif dipejalaika perintah dikena ngintu ( rehabilitate) pun rian ke endang udah bisi awakka ngasilka mayuh buah sereta bekualiti tinggi.
“Opis Menteri nengah Opis Betanam Betupi deka ngatur Program ‘Durian Rehabilitation’, laban asil ari perati kitai sepun rian ngeluarka buah tauka asil ke agi mimit. Bisi sepun nya 50 igi lalu bisi nya dua igi sepun.
“Lalu pekara ke pemadu dikemekuhka kitai iya nya ngintu ( rehabilitate) rian sereta kami deka berengkah ari stesen betanam betupi kitai.
“Program tu deka berengkah ba bulan baru laban sida bisi Standard Operating Procedures (SOP) ke diri empu baka ni deka ngenukuka pun rian tu suah bebuah sereta lebat. Baka ba Johor bebuah dua kali setaun, kitai ditu sekali setaun,” ku iya.
Uggah mansutka pekara nya lebuh dikerandau raban pengarang berita pengudah bejadika pengawa nganjungn pes rian ti keterubah ari Sarawak ke menua China ke diatur ba Top Fruits Sarawak ditu, kemari.
Ku iya, Tops Fruits Sarawak enggau raban betanam betupi kitai udah ngelawa kebun rian kitai ke alai bisi ngitung 600 pun rian ti mungkur 80 bansa( spesies), ngambika udah nyadi ‘ germ plasm’ dikena ngemansangka rian jemah ila.
Ari penyampau nya (600 pun rian) nyengkaum urung 200 pun ba Stesen Layar, Semenggoh (urung 200 pun) enggau ba Tarat urung 200 ngagai 300 pun kayu rian.
Nengah SOP ke dikemeranka sida nya ila ku Uggah, deka nyadika stesyen kitai jemah ila nyadi ladang model, orang betanam betupi dibai datai ngambika meda sereta ulih mereti nya sebengkah chara betanam ke ke meruan nyengkaum pengawa ngasuh galak, ngintu enggau tetap sereta ke bukai ke ulih nyungkak penatai pemisi.
Diatu sereta ngelama tu kitai semina nanam udah nya lalu ditinggalka lalu nya enda meruan, ku iya.
Ngenang silik pasal Program ‘Durian Rehabilitation’ iya madahka, beberapa iku orang betanam rian di nengeri tu deka dipilih ke tuju program nya.
“Berebak enggau tu kami minta beberapa YB lebih agi ba kandang menua Serian sereta di Limbang laban kitai bisi meda potensi besai ba Long Lama sereta Marudi, nya kebuah kitai minta YB milih orang ke betanam rian nya ngambika ulih berengkah bulan April tu ila sereta ulih bebuah ujung taun tu ila.
“Aku arap bendar tu deka mujur lalu taun baru kitai ulih nambahka asil ke dikeluarka kitai. Nya kebuh kitai chukup meransang orang betanam tu ngambika nanam rian,” ku iya.
Nitihku Uggah diatu sida iya benung ngiga chara baka ni ulih nyendiaka leka tauka benih ti chukup sereta murah.
Rega leka tauka benih diatu urung RM150 ngagai RM300 ti nyadi isu kelimpah ari deka ngenukuka benih tauka paung nya amat spesies rian Musang King, ke nyadi tanggungpengawa opis betanam betupi, ku iya.
Sama bisi datai ngulu pengerami nya kemari Menteri Muda Pemansang Tanah Adat Datuk Roland Sagah, Menteri Muda Betanam Betupi Dr Abdul Rahman Ismail, Mendam Sekretari Opis Menteri Betanam Betupi Moden, Tanah Adat enggau Pemansang Kandang Mengeri Datu Ik Pahon sereta Direktor Top Fruits (Sarawak) Sdn Bhd Chong Yie Loong sereta ke bukai.