Nengeri tu nagit deka mansutka 60 tan pes rian ba taun 2018
KUCHING: Juluk nengeri tu nengah Top Fruits Sarawak ba taun 2018 deka ngasilka 60 tan pes rian, ti begunaka urung 300 tan buah rian menua tu empu.
Berindik ari pekara nya Sapit Kepala Menteri Datuk Amar Douglas Uggah Embas meransang pekebun rian tauka orang betanam betupi nengeri tu ngambika ngintu baru sereta nyaga manah pun rian ke endang udah bisi sereta nyual buah ngagai kompeni nya.
Kompeni Top Fruits Sarawak udah nyadi Sempekat Pemereti Ati (MoU) enggau Opis Betanan Betupi Sarawak kena 13 November 2013, ti ngembuan juluk deka ngemansangka industri rian ba nengeri tu.
“(Ba pengujung musim rian ari bulan Disember 2017 ngagai januari 2018), kompeni nya udah meli 80 tan buah rian nengeri tu empu lalu ari nya mujur ngasilka 16 tan pes rian mata.
“Kami ngarapka taun tu, sida kompeni tu ulih nambahka agi pemayuh asil pes rian enggau penyampau buah rian ke dibeli. Lalu ari nya ulih nambahka asil ke dijual ngagai China,” ku Menteri Betanam Betupi, Tanah Adat enggau Pemansang Kandang Mengeri nya.
Uggah dikerandau raban pengarang berita pengudah bejadika pengawa nganjung asil pes rian mata keterubah ari Sarawak ke China kemari, ti diatur ba Top Fruits Sarawak ditu.
Buah rian 80 tan ke dibeli kompeni nya ke udah mujur ngasilka 16 tan pes rian mata ku iya dibeli kompeni nya ba bagi menua Kuching, Serian enggau Sibu. Jemah ila deka dikerembaika ngagai bagi menua bukai di Sarawak ngena char bererenggat.
Nambahka nya dikena ngemansangka industri rian ba Sarawak, Opis Betanam Betupi dalam taun tu deka ngemanahka agi IQF Tarat nyadi palan Ngumpul, Proses enggau Mungkus (CPPC) Tarat.
Enti palan nya udah tembu, Opis Betanam Betupi deka milih Top Fruits Sarawak nyadi operator ba CPPC Tarat.
“Juluk kami deka bisi sereta nyadika IQF tarat nyadi palan mungkus enggau proses kepenudi.
“Tang diatu palan nya benung dikemanahka. Nya alai dikena nentuka kompeni tu ulih meli rian maya musim rian taun nyin kemari, sida numbuhka palan sementara ditu,” ku iya.
Kilang kompeni Top Fruits berengkah bejalaika operasi ba palan sementara di Batu Kitang ditu kena 1 disember 2017, ke bisi 20 iku pengereja pengawa, ngasilka pes rian di ais.
Ngenang silik pasal pengerami nya kemari, 10 tan pes rian diais ti keterubah iya dianjung ke Johor sebedau dijual ke China.
Sama bisi datai ba pengerami nya kemari Menteri Muda Pemansang Tanah Adat Datuk Roland Sagah, Menteri Muda Betanam Betupi Dr Abdul Rahman Ismail, Mendam Sekretari Opis Menteri Betanam Betupi Moden, Tanah Adat enggau Pemansang Kandang Mengeri Datu Ik Pahon sereta Direktor Top Fruits (Sarawak) Sdn Bhd Chong Yie Loong sereta ke bukai.