Ninggalka rumah tauka tanah puang dalam timpuh ke lama tau kena ukum Seksyen 25 Buildings Ordinance 1994
KUCHING: Berindik ari jaku dawa mensia mayuh ke diau di sitak Lorong 5A, Jalai Pisang Barat, Kuching ke diayanka siti surat berita bedau lama tu tadi, Opis Kunsil Dewan Bandaraya Kuching Utara (DBKU) ngambi atur ngiga orang ke bempu rumah tauka tanah puang nya.
Ba siti jaku penerang ari DBKU kemari, sida madahka udah nganjung jaku tangkan ngagai orang bempu rumah/tanah nya, ngasuh sida iya meresika kandang endur nya.
Nitih ku penerang nya, DBKU madahka gaya bansa nya ke enda pedulika rumah tauka tanah puang nya tau mai penusah ngagai mensia mayuh ke diau di sitak nya.
Sitak rumah tauka tanah puang ke diteju bansa nya ngemediska mata meda endur kamah bansa nya, lalu iya mega tau alai nyamuk, tikus, lalat, ular, bayak sereta mayuh agi jelu ke tau nganu tauka bepenyakit ke tau ngenusahka pengerai mensia mayuh.
“Sitak rumah tauka tanah puang ke diteju bansa nya aja tau mega nyadi pemun penanggul rama sereta pengawa salah, pengawa ke enda manah sereta enda bemoral baka endur orang makai dadah, sereta ngereja pengawa salah bukai,” ku iya madah nengah penerang nya, kemari.
Penerang nya madahka rumah ke diteju bansa nya aja, seruran dipasuk ulih orang ke enda betanggungjawab ke deka enchuri barang baka besi jendila, kabel karan, kelimpah ari ngaga endur nya alai muai uras.
Ku iya, ngipak genteran tusun ukum nengah seksyen 25 Buildings Ordinance 1994, iya madah pengawa ngemutar, ngerubuh, ngemanahka agi rumah tauka tanah nya sereta ngemeresi ungkup orang ke bempu rumah sereta tanah nya.
Kelimpah ari nya mega, nitihka ungkup The Local Authorities (Cleanliness) By-laws 1999, orang ke bempu tanah puang enda tau enda ngemutarka tanah nya ngambika enda ngachau tauka ngenusahka mensia mayuh,” ku iya.
“Berindik ari tu, DBKU minta kerejasama mensia mayuh ke diau di mengeri betatika sitak rumah/tanah ke diempu kita, ke puang dijaga enggau manah, laban enggaika penusah bukai nyadi.
“Gaya ulah ke betanggungjawab patut dikereja kitai ngambika pengelantang pendiau kitai likun sereta pemaik,” ku iya.