Nadai pemerat chalun terus BN dikena laban mayuh sitak komponen BN ulih menang
KUCHING: Enda ngena formula chalun terus dalam Pengawa Bepilih Besai Menua ke- 14 ( PRU14) tu ila mandangka Barisan Nasional ( BN) Sarawak, pechaya parti nya deka teulihka pemujur ke besai.
Pensyarah Kanan Fakulti Sains Pentadbiran dan Pengajian Polisi Universiti Teknologi MARA ( UiTM) Sarawak, Dr. Saudi Narani madah taja pan pedis deka ngubah runding sereta penemu pengundi ba sekeda sitak ke dipadah ‘angat’ ke udah diambi ulih penyakal, kelebih agi Parti Tindakan Demokratik (DAP).
Sitak ke ‘angat’ ke dipadah munyi nya, baka sitak mengeri baka Bandar Kuching, Stampin, Sarikei, Lanang, Sibu enggau Mas Gading.
Bepelasarka pekara nya, Saudi nyerumba nadai pemerat chalun terus BN dikena laban mayuh sitak komponen BN tau dipadah ulih menang semadi mih di sekeda sitak Parti Sa’ati Rayat Sarawak (SUPP).
Iya madah, enda baka maya Pengawa Bepilih Besai Menua ke-11 (PRN11) dalam taun 2016, SUPP ke sekali tu nadai mandangka sida iya bisi penyarut milih chalun lalu sida ke tingkil ari parti nya, UPP nyadi parti ke bekaling enggau BN, nadai chalun ke tau dibantaika sida iya maya kerusi Parlimen.
“Nya alai, ari sukut pemerat, sigi patut chalun terus BN enda ibuh dikena maya PRU14 laban BN Sarawak agi tegut sereta tegap.
“Menang majoriti sereta sapa ke deka megai Perintah, ukai pekara ke berat. Enti alah pan, semina enam kerusi ‘angat’ nya aja,” ku iya madah lebuh dikerandau ditu, kemari.
Taja pia, Dr. Saudi nandu baru madahka nyangka bisi pemerat mansik baru pemutus PRN11, iya nya sekeda kerusi ke lantang tauka senang diambi ulih PKR baka Krian lalu pia mega BN di Telang Usan taja pan menang, tang enggau majoriti ke mimit.
Bepelasarka pekara nya, iya madah kerusi Parlimen di sitak baka Saratok enggau Baram begunaka pemerat ngemendarka chalun terus BN bediri.
Baka kerusi Saratok, Dr. Saudi madah dalam tiga sitak Kunsil Nengeri (DUN), iya nya Kalaka, Krian enggau Kabong, pemayuh pengundi BN bisi dalam 12,805 dibanding enggau penyakal ke semina manggai urung 8,025 aja.
“Taja pan ke semua penyakal alah, undi piak penyakal nyapai urung 62.67 persin nya chukup ngasuh BN berasai enda entu lantang di sitak nya,” ku iya.
Ke kerusi Baram, ku iya DUN Telang Usan begunaka pemerat ke solok nyamin pemenang BN laban majoriti undi di sitak nya dalam PRN11 semina nyapai 167 aja.
Ku iya, pemayuh semua pengundi BN di sitak Baram manggai urung 8,724 lalu penyakal nyengkaum chalun bebas manggai urung 7226.
“Nya alai, beratika pekara nya, urung 82.82 persin undi enda miak ngagai BN. Pekara bekait enggau milih chalun patut dipansik lalu formula chalun BN ulih mantu sitak bansa tu,” ku iya.
Formula chalun terus BN dipungkal ulih ex- Kepala Menteri, niang Pehin Sri Adenan Satem, kena ngemutarka penanggul milih chalun ba entara parti komponen BN maya PRN 11 Sarawak dalam taun 2016.
Baka parti komponen enda ulih ngemutarka penanggul milih chalun, nya kebuah pemesai BN ngasuh ngambika rayat netapka pekara nya lalu formula tu dipadah pilih ke pengabis manah.
Chalun ari parti ke bekaling enggau BN diberi peluang bediri nengah tikit BN tang enggau atur sida iya patut ningkilka diri ari pangku pengawa dalam parti politik sida, ke mai reti sida iya baka chalun bebas tang atas pengasih BN.
Formula tu udah meri asil ke manah lalu dipeda meri empas ke besai dataika mai pemenang ngagai BN, enggau chalun terus BN mujur teulihka 11 ari 13 kerusi alai sida iya bediri.
Formula bansa tu mayuh matak pemesai politik ari Semananjung Malaysia bisi ati deka nunda formula tu.
Sapit Menteri Besai, Datuk Seri Ahmad Zahid Hamidi kala madahka BN deka nunda formula tu lalu beratika pemerat bansa tu ulih dikena di Semenanjung Malaysia.
Chairman BN Melaka, Datuk Seri Idris Haron kala madahka chalun terus, siti pilih ke pengabis manah ngemutarka kerusi ri diperebutka entara parti komponen BN dalam PRU14.
Pilih tu mega di sukung ulih presiden Parti Progresif Rakyat, Tan Sri M. Kayveas ke kala madahka parti sida iya mega nyukung formula tu.
Nya alai, ari sukut pemerat, sigi patut chalun terus BN enda ibuh dikena maya PRU14 laban BN Sarawak agi tegut sereta tegap. Dr. Saudi Narani Pensyarah Kanan Fakulti Sains Pentadbiran dan Pengajian Polisi Universiti Teknologi MARA (UiTM) Sarawak