Anang salah ngena lisin dagang ke pengawa salah bukai, ku Fazzrudin
KUCHING: Anang salah kena lisin dagang, enti enggai napi kena tinggang atur undang-undang.
Jaku lalau nya dipansutka Kaban Kunsil Nengeri (ADUN) Tupong, Fazzrudin Abdul Rahman madah ngagai sida ke bempu palan dagang tang bejalaika pengawa salah, belalai ari pengawa dagang ke endar ti dipejalaika sida iya.
“Kena lisin ti udah diberi ngagai kitai enggau chara ke betul, lalu titihka atur undang-undang bedagang,” ku iya.
Fazzrudin madah munyi nya lebuh nimbal jaku dawa ke madahka bisi kedai 24 jam ke nyual ‘reload’ kena bemain judi nengah ‘online’ di sitak ADUN nya.
Fazzrudin nandu baru, iya enda jenuh aja mending pekara nya tang deka mantu Opis Kandang menua (PBT) ngemunaska pengawa salah nya sebedau pengawa salah nya ngerampit bala nembiak ke diau di sitak nya.
“Aku besedia meri kerejasama enggau PBT ngemunaska pengawa salah bansa tu di sitak tu.
“Aku bisi nerima jaku dawa ke madahka mayuh bala nembiak ke bebelika ‘reload’ judi ‘online’, lalu enti amat munyi jaku dawa nya, pengawa salah bansa tu tau ngerampit ngagai pengawa salah bukai,” ku iya madah lebuh dikerandau ditu, kemari.
Iya nandu baru madahka jaku dawa nya ukai semina bekait enggau penanggul bejudi, tang bisi sekeda orang ke enda betanggungjawab ke udah mabuk ngachau sereta ngerusak reta tengkira orang bukai.
“Bisi sekeda orang ke bebelika arak di kedai nya, lalu ngirup besemak endur nya, enti udah mabuk, nyau enda ulih nguntrul diri empu lalu ngachau kedai besemak nya dia, dataika bisi sekeda kedai ke rusak.
“Aku ngarapka semua renggat komuniti sama nyaup ngemunaska pengawa salah tu,” ku iya.
Iya mega ngarapka piak opis bekuasa deka ngambi atur ke terit bekait enggau penanggul nya, baka ke udah diungkupka dalam undangundang.
Ba lansa bukai, Ketuai Polis Pelilih Menua Kuching, SAC Abang Ahmad Abang Julai lebuh dikerandau madahka sepiak polis nyambut pengawa manah ke digaga komuniti ke beratika pengawa salah bansa nya dikemunaska di pelilih menua tu.
Ku iya, polis seruran betatika pengawa ngemunaska pengawa salah nya ninting hari, ngambika menua tu punas ari pengawa salah bemain judi.
“Tu pengawa ke manah kedeka kami (polis, lebuh bisi piak ke deka bekerejasama ngemunaska pengawa salah bemain judi,” ku iya.