PKR enda ulih menang di kerusi Parlimen Miri maya PRU14
MIRI: Parti Keadilan Rakyat ( PKR) enda ulih menang di kerusi Parlimen Miri maya Pengawa Bepilih Besai ke- 14 ( PRU14) tu ila, laban beratika pengari rayat enggau parti nya empu, dalam kandang lima taun tu ke udah, sigi enda ngereja pengawa sida iya gawa ke rayat di Miri.
Siku kaban politik veteran, Hasnan Ahmad madahka PKR tauka penyandang ke diatu nadai dipeda ngelawa genturung pendiau komuniti Melayu di Miri dalam kandang loma taun tu ke udah, lalu beratika pekara nya ku iya, pengundi deka ‘mayar pulai baru’ nengah chara enda ngundi penyakal ke sekali tu.
“Rayat ingat sapa ke datai mantu sida tauka nemu sapa ke semina gagau bepolitik tang nadai sekali mantu, nya kebuah chalun BN ke sekali tu dipilih rayat Miri ke sekali tu,” ku Hasnan madah lebuh dikerandau ulih The Borneo Post ditu, kemari.
Penyandang Miri kediatu, iya nya Dr Teo Yu Keng, ti mega nyadi Ketuai PKR ke pelilih menua Miri.
Hasnan nandu baru madahka, tu mih nyawa rayat ditu, ke madahka nadai pemansang digaga di Miri dalam kandang lima taun tu ke udah, lalu nya ke ngasuh rayat Miri nyau lelak mendingka jaku penyakal ke semina bejaku aja tang nadai sekali ngaga pemansang di Miri.
Iya mega bedawaka penyakal pan nadai dipeda ngelawa genturung pendiau sereta palan rumah mensia mayuh di Miri dalam kandang lima taun tu ke udah, tang semina dipeda ba pengawa bepilih ke udah, minta sukung mensia mayuh lebuh ngaga kimpin sida iya ba palan strategik di bandaraya tu.
Hasnan nandu baru madahka, pengundi di Miri nyau lelak meda politik bansa tu, ke nadai sekali mai pemansang ngagai Miri.
“Kami ngelalau rayat Miri ke nyukung penyakal maya pengawa bepilih ke udah, pulai baru lalu nyukung chalun BN ngambika Miri ulih dikemansangka jauh agi nyadi sebuah bandaraya ‘Resort City’ enggau macham bengkah pemansang ke deka digaga,” ku iya.
Iya nandu baru madahka danji ke digaga PKR maya pengawa bepilih ke udah, laban deka matak undi sida iya, semina tinggal danji aja.
Ba lansa bukai, Hasnan mega minta pemesai SUPP enggau UPP ngaga kerejasama baka ke udah dipadah ulih Kepala Menteri Datuk Patinggi Abang Johari Tun Openg, ngulihka kerusi majoriti China di Sarawak pulai baru.
Iya madahka, nitihka stastik ari pengawa bepilih ke udah, mayuh majoriti kerusi China dimenang ulih BN, mandangka kelai ke manah, nyangka Miri mega ulih diambi pulai baru maya PRU14 tu ila.
Bekunsika penemu ke sebaka nya mega, pegawai pemadah PBB pampang mit Pujut, Mohamad Bakar madahka wakil rayat kediatu enda betatika penanggul rayat di Miri, lalu nadai mai perambu pemansang ngagai bandaraya tu.
Ku iya, rayat nadai udah meda pemansang ke digaga di Miri ngelama tu, pengudah penyandang nya dipilih nyadi pengari ke Miri.
“Belandikka pekara tu, enti nadai penyakal ke tegap di Miri, BN deka ngambi pulai baru Bandaraya Miri,” ku iya.