Teras pampang Krian deka seruran nyukung Mawan
KUCHING: Chairman Parti Tenaga Rakyat Sarawak ( Teras) Pampang Krian Banyi Beriak madah bala sida deka seruran nyukung Kaban Parlimen (MP) Saratok Tan Sri William Mawan Ikom seagi politik iya dalam langkar Barisan Nasional (BN).
Banyi seruran mantaika ngagai mensia mayuh ke alai sida deka nyukung pengawa ex-presiden parti sida, Mawan, sekali pan iya enggau Parti Pesaka Bumiputera Bersatu (PBB), parti komponen besai BN nengeri ke nyadi pemutus parti politik iya diatu.
Ku iya, taja Mawan udah ngelanjar iya ketegal penyelai gaya politik di Saratok, ku Banyi.
Sepengudah iya empu ngaku endang orang BN, Mawan ulih ngenegapka baru penyukung enggau ex-penyukung BN sereta mega mai bala kaban penyakal ngagai gempung perintah.
Enti belalauka pengering politik Mawan, BN naka ulih nyemelaka BN ti enda tegap di Saratok ngelama tu, berengkah ari maya sida lenyau penuduk DUN Krian ngagai penyakal maya pengawa bepilih nengeri 2011, muka jalai ngagai Parti Keadilan Rakyat ( PKR) di Saratok.
Ku Banyi, Mawan udah mayuh gawa ngemansangka Saratok enggau penau sereta ulah iya empu ti kemerah ungkup BN.
Ku Banyi, Mawan ulih seruran bepanggai ba urung 4,000 iku kaban rejista Teras Krian nyema iya dichalun baru ari bala ketuai BN ngetanka penuduk Saratok ungkup BN maya Pengawa Bepilih Besai (PRU) tu ila.
Kena Hari Satu ( 19 March) tu tadi, Mawan udah mantai ba aum pengarang berita ke alai iya endang kaban PBB kenyau ari taun 2016, tang ngelanjarka pekara nya ketegal pemerat politik, kelebih agi lebuh iya ngaul menua Saratok.
Dalam taun 2014, Mawan udah dipansutka ari Parti Demokratik Progresif Sarawak ( SPDP) berindik ari bisi sekeda penemu politik enggau bala ketuai parti lebuh iya nguji ngemai pulai baru lima iku ex-epngari rayat SPDP (dikumbai G5) ke dalam parti.
Iya enggau empat iku ari kaban G5 nya begulai lalu numbuhka Teras.
Berindik ari PRN 2016, Mawan enggau dua iku kaban G5 - Rosey Yunus enggau Paulus Palu Gumbang - ningkilka diri ari Teras ngambika sida ulih bediri ngena tikit BN di Pakan, Bekenu enggau Batu Danau enggau leman sida ngaul diri ba sebarang komponen parti BN pengudah bepilih.
Pengudah PRN 2016 tembu, Mawan, Rosey enggau Paulus sereta tiga iku chalun terus BN ke bukai nyemilik PBB.
Seraya ba mensia mayuh sida mantaika status nyadi kaban parti, Mawan milih diau diri lalu terus gawa di Saratok enggau Pakan ngena lambang BN.
Banyi ba sekeda program madahka BN nyadi indai semua komponen BN lebuh ngetanka status Mawan tetiap kali iya dipejah nadai parti.