Nengah pemansang teknologi tu mega patut dikena tetiap komuniti enggau manah lalu ukai ungkup naburka berita selebubu ngapa
KANOWIT: Pemansang ekonomi digital endang ngembuan tanggungpengawa beguna endar ba pengawa ngemansangka ekonomi, komunikasyen enggau rama komuniti di menua pesisir.
Kaban Kunsil Nengeri (ADUN) Machan, Allan Siden Gramong madah, revolusyen dunya nadai sekat enggau rentayan globalisasyen ulih ngemai pengulih ekonomi baru di menua pesisir.
“Taja pia, enti disalah guna internet tau ngenusah. Ambika chunto media rama baka ‘Facebook’, ‘Whatsapp’ enggau ke bukai nyema kita naburka sebarang isu tauka jaku petenah nadai bebatang ti betul tau nerima atur undang-undang.
“Nya alai, kena perengka guna internet ungkup pemaik,” ku iya rambau Program Pemesai Begulai Enggau Rayat sereta Merarau di Rumah Barnabas, ditu, apin lama ke udah.
Allan meransang semua peranak Rumah Barnabas enggau Parlimen Kanowit nyukung Datuk Aaron Ago Dagang maya Pengawa Bepilih Besai (PRU) ke-14 ti deka datai.
“Sukung nya beguna endar ngambika perintah Barisan Nasional (BN) ulih nampung pengawa pemansang di Parlimen Kanowit,” ku iya.
Sama bisi datai Kaban Parlimen Kanowit Datuk Aaron Ago Dagang, Pemancha Spencer Kudang sereta urung 500 iku peranak ke bukai.
Taja pia, enti disalah guna internet tau ngenusah. Ambika chunto media rama baka ‘Facebook’, ‘ Whatsapp’ enggau ke bukai nyema kita naburka sebarang isu tauka jaku petenah nadai bebatang ti betul tau nerima atur undang-undang. Allan Siden Gramong ADUN Machan