‘Konsert Amal Artis Vateran Iban‘ deka diatur kena 31 Mac tu ila

KUCHING: Mensia mayuh diperansang sama enggau ngerami, nyukung seraya meri pemeri ngagai raban artis veteran Iban nengah konsert ke deka diatur kena 31 Mac tu ila.

‘Konsert Amal Artis Veteran Iban’ disadang deka diatur ba Riverview Station Cafe, Taman Riveria, Tiya Vista di Kota Samarahan ari pukul 2 lemai ngagai 12 tengah malam.

“Tuju besai aktiviti tauka program tu diatur dikena ngumpul pemeri ngambika bisi dikena mantu raban artis veteran Iban jelai nama ba Sarawak ke benung sakit,” ku pengari pengatur konsert nya.

Aktiviti nya diatur Riv- erview Station Management enggau kerejasama Kimara Band sereta Kelab Sukan dan Rekreasi Bermotor Sahabat Kear United.

Entara artis veteran Iban ke benung sakit ke diperambu deka dibantu nengah program tauka aktiviti tu baka Ganning Asan, Edward Kuju, Jeffery Molly, Christopher Kerry Landong enggau Ester Bayang.

Tuju bukai konsert nya diatur dikena nempa pengerindu dalam lumba enggau main motor kelimpah ari ngerapitka kaul raban nembiak ba serata Sarawak, awakka ulih mantu nyeliah ari ngereja ulah ke enda meruan.

Kelimpah ari nya aktiviti bukai diatur nyerumba konsert tu baka tabung amal tauka pengasih tebuka ngagai mensia mayuh, enchabut tikit benasit sereta duit asil ari tu diberi ngagai tabung pengasih, pemerindang ari artis Iban enggau Sape.

Autoshom kereta enggau Big Bike sereta gerai bejual barang pemakai enggau bejual gari enggai aksesori kereta bisi diatur.

Sebarang tanya bekaul enggau konsert tu tau ditanya ngagai Frankie ba lumur 013-4944004, Nicko (0192050853) enggau Grace ngarika Autoshow ba lumur 016-8094700.