Program betuchuk vaksin dipajakka di Marudi dikena ngemunaska penyakit rabies
MARUDI: Menteri Muda Opis Kandang Menua (PBT) datu Penguang Manggil muji Opis Veteriner pampang Miri laban pengawa sida iya ke nuchuk vaksin ke penyakit Rabies digaga dalam kandang ke besai, kelimpah ari meri penemu ngagai mensia mayuh pasal penyakit ukui gila tauka rabies.
“Sapa ke napi penyakit rabies tu sigi nadai ubat ke ulih ngubat pesakit nya. Nya alai, berat endar ke mensia mayuh ke bisi ukui, mayau, kera tauka jelu bukai dibai beruchuk vaksin ngagai sepital tauka klinik besemak enggau kita.
“Enti bisi orang ke udah kena ketup ukui, mayau tauka kera, betatika pemeresi diri. Tuchi telih nya enggau ai papip dalam kandang 15 minit enggau sabun, lalu udah nya bai ngagai klinik tauka sepital semak enggau kita,” ku iya.
Iya madah munyi nya lebuh bejaku ba atur pengawa ngepunka Program Beruchuk Vaksin Rabies renggat Opis Pelilih Menua Marudi di Dewan Suarah Baram ditu, kemari.
Penguang ti mega nyadi Kaban Kunsil Nengeri (ADUN) Marudi nandu baru madahka di sarawak, bisi tiga buah sitak ke agi napi penyakit Rabies, iya nya Julau, Sri Aman enggau Kuching.
Penyakit rabies tu ku iya nyangka datai ari menua sepoak sarawak, iya nya ari Indonesia. Di Pelilih Menua Miri aja, bisi urung 3,000 iku ke diempu ulih urung 833 iku mensia mayuh.
Tu kelima kali kimpin tu udah digaga ketegal Perintah betatika pekara tu.
“Nyema bisi temuai ke datai ari Brunei nurun ke Miri, ngarapka kitai ulih ngaga papan tanda tauka nutis ke madahka temuai mega ulih dituchuk ngena vaksin rabies ditu, nyema sida iya bisi napi penyakit bansa tu,” ku iya.
Program meri vaksin nya diatur ulih Opis Pelilih Menua Marudi enggau Opis Veteriner Miri, PDRM, Opis Pengawa Betanam Betupi, Dewan Suarah enggau sekeda ijinsi bukai.
Sama bisi enggau ngulu atur pengawa nya kemari, Pegawai Pelilih Menua Marudi, Mackos Sibong, Pemangku Pegawai Veteriner, Zulkifli Stephen Lakoi, chairman MDC, Cr.Edward Mendai, pengari ari PDRM, ASP Jami Hussein enggau ketuai komuniti.