Ketegal enda nitihka standard TTPRS responden mayar ganti rugi pulai baru

SIBU: Tribunal Tuntutan Pembeli Rumah Sarawak (TTPRS) merintah sebuah kompeni mayar ganti rugi dalam RM114,181 ketegal laun nyerah rumah sereta endur belelak ngagai siku pemeli.

Presiden TTPRS, Peter Lim Thiam Seng lebuh ngaga pemutus nya mega ngasuh orang ke nimbal nya ( reponsden) mayar ganti rugi dalam kandang 45 hari, berengkah ari kemari.

Iya nandu baru madahka, enti sepiak kuntriktor nya enda ulih ngamatka semaya nya, sida iya ulih dikena ambi atur undang-undang nengah genteran tusun ukum ‘Seksyen 53(1), Ordinan Pembangunan Perumahan (Kawalan dan Lesen) 2013’ ke tau ngukum sida iya enda lebih ari RM5,000 tauka kena jil enda lebih ari dua taun tauka kededua nya sekali.

Sebedau nya, orang ke nagih dalam kes tu, Yek Mee Huong minta ganti rugi dalam penyampau RM106,171 pengudah kuntriktor nya laun nyerah apartment ke dibeli iya enggau rega RM968,000 kena 4 Julai, 2013.

Apartmen nya diserah kena 15 Ogos, 2017 pengudah permit ulih alai diau ( OP) dikeluarka kena 8 Febuari, 2017.

Dalam siti kes bukai, Lim meri timpuh dalam kandang 30 hari ngagai kuntriktor miki semua perengka guna ke rusak di sebuah rumah teres dua ringkat ke didawa tuduh.

Sida kuntriktor ku Lim, enda tau enda miki perengka guna ke rusak nitihka stindit ti udah ditetapka ulih Opis Menteri Pengawa Berumah.

Orang ke minta ganti nya, Ho Kee Lee sebedau nya minta bayar ganti rugi dalam penyampau RM15,000 ari responden pengudah bedawaka rumah ke dibeli iya kena 14 Julai, 2014 nya tuduh.

Ku Ho, tuduh nya ditemu ba siling rumah di bilik tinduk, ruai, dapur enggau palan paking kerita, pengudah sida iya bepindah ngagai rumah nya, ujung taun 2016.

Ba dua iti kes bukai, bekait enggau kuntriktor ngaga rumah ke sama, TTPRS ngasuh sepiak responden mayar urung RM19,000 ngagai orang ke minta ganti nya, Nyulang Lassa, ketegal laun nyerahka rumah dalam kandang 57 bulan.

Ba siti kes bukai, sepiak responden besetuju mayar pulai baru penyampau urung RM12,000 ngagai siku orang ke minta ganti, Bahtiah Ibrahim, ketegal pekara ke sebaka, pengudah kededua piak bejuraika pekara nya di luar tribunal.

Hakim ke mendingka kes nya kemari, dipendingka ba mua kaban panel, iya nya Robert Elone Sireng enggau Alhadi Ibrahim.