Pemeri elawin khas deka meri peransang ngagai raban Bomba

KUCHING: Elawin Khas Skim Perkhidmatan Bomba sepenyampau RM200 siti ari chara ngakun sereta meri peransang ngagai raban Pengerara Api enggau Penyah Penusah (BOMBA) nyengkaum ba Sarawak meri servis pemadu engkeman.

Berindik ari pekara nya Direktor Opis Pengerara Api enggau Penyah Penusah Malaysia (JBPM) Sarawak, PKPjB Nor Hisham Mohamad beterima kasih ngagai Menteri Besai sereta Opis Menteri Pengelantang Mengeri, Pengawa Berumah enggau Opis Kandang Menua (KPKT) ti udah beratka raban Pengerara Api enggau Penyah Penusah n ya.

“Berasai gagit ati sereta udah tentu gaga ati laban udah ngakun raban Pengerara Api enggau Penyah Penusah.

“Tu udah tentu nyadi peransang besai ngagai raban bomba deka terus meri servis bomba enggau nyelamat.

“Terima kasih ngagai YAB Menteri Besai enggau KPKT laban ti berat sereta ngemendarka nya (elawin),” ku iya madah ngagai Utusan Borneo nengah aplikasyen WhatsApp ditu, kemari.

Nor Hisham ngenataika pengaga nya lebuh dipinta meri penerang bekaul enggau Elawin Khas Skim Perkhidmatan Bomba sepenyampau RM200 ke udah dikemendarka Dewan Rakyat ensanus.

Berita manah nya dibantaika Menteri Besai sereta Opis Menteri Pengelantang Mengeri, Pengawa Berumah enggau Opis Kandang Menua, Tan Sri Noh Omar lebuh ti nyimpul jurai ba Dewan Rakyat ensanus.

Menteri nya madahka bisi urung 13,342 raban JBPM di serata menua deka nerima elawin khas sepenyampau RM200 nya berengkah ari 1 April tu, dikena ngingat sereta ngenang servis raban bomba ti meri bantu maya penusah ngenyit nyadi.

Kelimpah ari nya, menteri nya mega madahka bisi penambah elawin sepenyampau RM2 lebih agi ngagai raban bantu bomba ari RM6 sejam ngagai RM8 sejam, lalu pemesai ari RM7.80 ngagai RM9.80, ti berengkah dalam timpuh ke sama.