Sarawak udah ba penuduk nya kenyau ari bebelas taun ke udah
KUCHING: Sarawak ba penuduk lumur tiga pemadu baruh ba sentang kes dadah enti dibandingka enggau nengeri bukai.
Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madah Sarawak udah ba penuduk nya kenyau bebelas taun ke udah.
“Kitai berasai gaga tajapan garis adan menua kitai panjai enggau kandang tasik kitai mudah ditengah.
“Taja pia, nembiak kitai ditu enda malut diri enggau penusah tu (dadah).
“Kes dadah di nengeri tu diintu manah lalu kitai deka nentuka pekara tu mengkang baka tu belama. Enti ulih nadai kes dadah di nengeri tu,’ku iya.
Karim mansutka jaku nya ba aum pengarang berita pengudah ngulu aum ‘Persatuan Mencegah Dadah Malaysia ( Pemadam)’ Pampang Sarawak di sebuah hotel ditu, kemari.
Ngenang kaul ke sama, iya madah kes ke bekaul enggau dadah di Pelilih Lawas diatu diintu manah.
Ku iya, polis narkotik begulai enggau Ejensi AntiDadah Menua (AADK) bisi bejalaika operasyen lalu nangkap orang nyual dadah di pelilih nya.
“Taja pia kitai anang irau, maya polis tauka AADK bisi nangkap orang ke bisi kaul enggau kes dadah, anang mikir nya siti penusah ke besai.
“Polis enggau AADK udah bejalaika tanggungpengawa asil padah mensia mayuh,’ku iya.
Kelimpah ari Lawas ku Karim nambah, ijinsi ke bekaul mega matau Pelilih Miri, Limbang sereta Bintulu.
Iya melaba dadah tu datai ari tunga utara Sarawak baka ari Limbang enggau Lawas.
“Berindik enggau nya, kitai deka neritka agi atur nyaga garis adan menua ngambika dadah enda mudah tama ke nengeri tu,”ku Karim.
Bela bisi datai mandal Presiden Pemadam Menua Datuk Omar osman.
Kitai berasai gaga tajapan garis adan menua kitai panjai enggau kandang tasik kitai mudah ditengah. Datuk Abdul Karim Rahman Hamzah Menteri Dagang Temuai, Seni, Main Asal, Nembiak enggau Lumba