Pengerami Mantar Gawai PEDAS deka diatur kena 28 April tu ila

KUCHING: Serakup Dayak Sarawak (PEDAS) Pampang Sibu nesau mensia mayuh bela sampal datai ngulu pengerami Malam Mantar Gawai Pedas 2018 ti deka diatur kena 28 April, urung pukul 6 lemai.

Batang tuju atur pengerami tu nitih ku Ketuai Pampang PEDAS Sibu, Matthew Mudai, dikena ngerapitka tanggam kaul antara kaban serakup enggau bala bukai seraya berami begulai enggau pangan diri, nadai ngira asal penatai enggau pengarap sereta bansa.

“Seraya kitai berami sebedau mulaika diri ke menua ngintu gawai, tu awak chukup manah dikena ngerapitka tanggam kaul enggau pangan diri.

“Pengerami tu mega nyadi pelasar ngempung semua kaban serakup datai ari selampur nengeri, begempuru lalu bekelala kelebih agi bala kaban serakup ke baru rejista nyadi kaban,” ku Matthew ngarika bala komiti bukai lebuhka dirandau pengarang berita apin lama ke udah.

Pengerami tu deka diatur di sebengkah palan makai tebilang di Sibu lalu barang sapa deka nemu penerang silik pasal pengerami tu tau betanya ngagai kaban komiti ti udah dipadu gawa iya nya Yong Chai ( 01129201355), Jarau Jenggot ( 013- 6070213), Sharon ( 013- 8311648), Lyn Ben ( 011- 18820479) enggau Jenggot Atan ( 0142862420).

Mayuh macham atur pengerami bisi dirintai nyerumba malam mantar gawai ungkup taun tu ke alai PEDAS Pampang Sibu dipadu nyadi tuai rumah, nyengkaum chabut tikit benasit, belagu karaoke, lagu dipelanja enggau ke bukai.

Agi ngemeranka rambai jaku ‘Setempap Enda Rarat, Seinchi Enda Rari’, juluk raban PEDAS endang

“Bala komiti mega bisi ngangauka sekeda bala pemesai enggau ketuai di nengeri tu bela datai ngerichahka agi pengerami tu ila kelimpah bala kaban enggau ketuai Gempung Ukai Dikuasa Perintah (NGO) ke bukai.

“Kitai endang ngelaluka penatai bala kaban NGO bukai bela berami seraya ngaul pangan diri rat agi, kelebih agi NGO Dayak,” ku Matthew nyimpul jaku diri.