Tabung Darah HUS suntuk bekal darah B enggau A
KUCHING: Tabung Darah Hospital Besai Sarawak (HUS) napi suntuk bekal darah B enggau A ke majak mimit.
Penerang ari Tabung Darah HUS kemari madahka, pengurang bekal darah nya ketegal bekal darah B enggau A ke mayuh dikena ngubat orang sakit di HUS.
Berindik ari nya, mensia mayuh kelebih agi sida ke deka meri darah dipinta datai meri darah di Tabung Darah HUS tauka maya kimpin meri darah ke besemak enggau sida iya.
Ujung minggu tu ila, ‘Unit Bergerak Kempen Derma Darah TDHUS’ deka ngaga kimpin nya di tiga bengkah endur di bandaraya Kuching.
Kena 24 March tu ila, opis pengibun Damai Beach Resort bisi ngaga kimpin meri darah ti deka digaga di Damai Beach Resort, Teluk Bandung, Santubong berengkah ari pukul 9 pagi ngagai 1 ngalih hari.
Lalu dalam timpuh nya mega, Komiti Kereja Pemansang Pengelantang Pendiau sereta Komuniti Kolej Kediaman Kelima Universiti Malaya (UM)bisi ngaga kimpin meri darah di Palan Bebeli Barang Vivacity berengkah ari pukul 10 pagi ngagai 3 lemai.
Kimpin ke sebaka bisi digaga Kuching Lifecare Society kena 25 Mac, di Glassroom, Ringkat 2, Palan Bebeli Barang Boulevard berengkah ari pukul 10 pagi ngagai 3 lemai.
Sida ke enda sempat enggau ngulu kimpin meri darah tu, tau terus ngagai kaunter alai nyali darah di TDHUS, ke dibuka ninting hari nyengkaum maya belelak tengahari berengkah ari pukul 8 pagi ngagai 4.30 lemai.
Palan paking kerita ke mensia mayuh ke deka meri darah di kaunter nyali darah, bisi disediaka ba mua pintu penama ngagai Tabung Darah HUS.
Penerang nya madah baru, kerejasama mensia mayuh berat endar kena beratika bekal darah seruran chukup kena nampung pemerat bekal darah di HUS.