Pengidup rayat di Sungai Yong jauh belinsur sekumbang bisi jalai darat
KAPIT: Kaban Kunsil Nengeri (ADUN) Bukit Goram Jefferson Jamit Unyat bisi bejalai ngabas jalai genturung pendiau muakka kiba tebing Sungai Yong ditu.
Iya disempulang Sekretari Parti Pesaka Bumiputera Bersatu (PBB) Bukit Goram, Edward Manggah enggau pemesai bukai.
Jalai batu sepanjai 4 km, beungkus RM900,000 ti digaga di baruh ‘Membina Jalan Berhubung Desa’ ari simpang Jematan Sungai Ulu Yong ngelawa Rumah Ngelai Ampas di Sungai Yong.
Tu projek pengawa begulai laban Sapit Menteri Pemansang Menua Pesisir enggau Kandang Menua, Datuk Alexander Nanta Linggi ke mega Kaban Parlimen (MP) Kapit udah ngagihka RM500,000 dikena ngaga jalai batu sepanjai 4 km seraya Jamit nengah Projek Transformasyen Menua Pesisir (RTP) ngagih penyampau RM400,000 dikena ngaga empat jematan besi sepanjai jalai nya.
Jematan besi dikena nukar jematan kayu ke dikena ngelama tu.
Bejaku ngagai Borneo Post, ku Jamit, dulu suba peranak rumah panjai ke diau di Sungai Yong bepanggai ba perengka pengangkut sungai napi mayuh pemar laban ke jauh sereta bepanggai ba gaya penalam ai.
Ku iya, sida mindah ngena perau panjai ari Kapit nengah Batang Rajang napatka Sungai Yong.
Ari Kapit ngagai rumah panjai pemadu ulu, Rumah William, pala menua Sungai Yong, urung tujuh ngagai lapan jam pejalai.
Ku iya nambah, Rumah Ngelai Ampas, ili Sungai Yong pen begunaka tiga ngagai empat jam pejalai.
“Diatu jalai datai di Ulu Yong lalu ke ili ngagai Nanga Yong, penyauh enggau timpuh pejalai udah pandak ngagai sejam setengah. Tu sambung jalai ti lantang agi.
Suba peranak rumah panjai bumai ungkup diri empu. Diatu sida nyadi orang bumai betanamka sayur enggau asil kampung dijual di Kapit. Tikas pengidup sida jauh udah nyulut.
Ari pemisi jalai ngagai Ulu Yong, rumah panjai di sepanjai Sungai Ulu Yong enggau mega Sekula Primari (SK) Ulu Yong diatu udah ngasaika bekal kuasa karan 24 jam nengah Skim Bekal Kuasa Karan Menua Pesisir. Mayuh sida ti ngempu tanah diatu berimbaka tanah sida betanamka utai tanam dagang besai kelebih agi getah,” ku Jamit.
“Kami ngaga jalai ngagai Rumah Ngelai Ampas enggau rumah panjai bukai, Rumah Roland Bangau di Sungai Tisa, pati Sungai Yong ti keterubah disambung ngagai pasar.
“Pekara beguna endar, ari perati aku, tanah ditu tebal agi manah endur pengawa betanam laban ari gaya tanah bejugu enggau ami.
Aku bisi dua pekara dalam runding dikena ngemayuhka aktiviti ekonomi ditu, keterubah iya bejalaika pengawa nanam utai tanam dagang besai baka getah.
“Kedua iya, ‘Sistem Tagang’ dikena gazet Sungai Tisa enggau sebagi ari Sungai Yong ungkup ikan sungai dikena nyapai penyebela eko antara utai idup dalam ai enggau menua tu nyadika pemansut protein ikan,” ku Jamit.
Tuai Rumah Ngelai Ampas ke megai 36 pintu bilik, meri terima kasih ngagai Nanta enggau Jamit ti udah ngagihka belanja dikena ngaga jalai nya.
“Penyampau ruang bilik di rumah panjai aku bisi nambah laban mayuh pengempu tanah ditu mulaika diri baru beridup ditu. Ari semina 10 pintu aja, naka diatu aku udah rejista 36 pintu,” ku Tuai rumah Ngelai Ampas.