Kompeni tu deka nyaga sereta ngatur lalu megai kuasa penuh ba industri minyak enggau gis di nengeri tu, ku Abang Johari
MIRI: Petroleum Sarawak Berhad ( PETROS) deka berengkah ngiga pemansut minyak enggau gis di Miri taun tu, lalu megai kuasa penuh nyaga sereta ngatur industri minyak enggau gis berengkah bulan Julai tu.
Kepala Menteri Datuk Patinggi Abang Johari Tun Abang Openg madah ari berengkah aktiviti neresa tauka ngerumbak tu, perintah nengeri ulih ngemansangka guna pemansut minyak enggau gis asal nya di baruh Senarai Negeri belalauka Jadual 9 Konstitusyen Perintah Besai, lalu ngingatka sida ti bemainka pinta hak nengeri tu pekara ti enda masuk akal.
“Tu manah endar ngagai komuniti dagang maya aktiviti tu berengkah ila,” ku iya rambau randau begulai enggau komuniti dagang ditu, diatur Balai Dagang enggau Industri Sarawak ( SCCI) Wilayah Miri di sebuah hotel tebilang, ditu.
Taja pia, Abang Johari enda nerang silik kemaya prospek operasyen baka nya deka berengkah dipejalai.
“Semua raban enggau kompeni ti ngaul diri dalam industri minyak enggau gis meseti bisi lisin, permit, suwa enggau pemendar ti nitihka pinta di baruh Ordinan Perlombongan Minyak tauka Ordinan Pengagihan Gas.
“PETROS deka nyadi luan nengeri tu ngaul diri dalam sektor minyak enggau gis chara strategik lalu tu beguna endar ngagai juluk pemansang sosioekonomi Sarawak, maya berengkah nyadi pemain besai industri minyak enggau gis.
Ku Abang Johari, perintah udah gawa minta hak royalti minyak enggau gis sepenyampau 20 peratus, di baruh pegai ex- Kepala Menteri Niang Pehin Sri Tan Sri Adenan Satem, tang tu ukai pekara muntang enti nadai setuju ari Perintah Besai, laban Konstitusyen udah netapka kadar 10 peratus.
Iya mega ngelalau bala komuniti ngambika muka runding besai agi lalu meda industri minyak enggau gis nyadi injin ngemesai sereta dagang di nengeri tu.
Meri gaya penerang bekaul perambu iya ungkup nengeri tu, kepala menteri madah sektor peribit patut proaktif enggau nyingkang pansut ari zon lantang sida ngagai bidang dagang baru ti manah enggau pemungkal Revolusyen Industri 4.0.
Ku iya, sejarah diasaika Miri nyadi menua ngepunka industri minyak enggau gis, bela nerima empas enggau ekonomi baru ke diatu iya nya berengkah enggau kuasa tau dikena baru, mayuh agi mansutka pemakai dipinta, ngelakuka pengawa dagang temuai baru enggau realiti maya sereta sektor ke bukai ti nyediaka mayuh agi pengawa puang enggau penatai pemisi.
Ku iya, bisi peminta nampung ngagai ekonomi global ke alai QR Code, Fintech enggau teknologi bukai dikereja enggau chara konvensional dikena bedagang di Sarawak diatu berengkah ngagai ekonomi digital enggau Industri 4.0.
Iya merambu bala konglomerat tauka tukuh korporat bela begempung, ngiga pemansut (belanja) dikena nyuwa bilun ungkup penerebai rentayan antarabansa ti teguh di Miri seriris enggau produk dagang temuai disetipak dikena matak mayuh agi temuai ngagai mengeri tu.
Ngelansa pasal pengawa betanam betupi, ku Abang Johari, perintah nengeri udah ngemendar pengawa meli bilun beungkus RM10 juta dikena nambahka eksport produk betanam betupi ari nengeri tu kelebih agi ngagai Singapura, nyadi makit (menua luar) pemadu semak.
Bilun injin tunggal Beech nya, ulih ngemai manggai tiga tan barang lalu Perintah Nengeri udah meri pemendar ngaga jalai langit di Sadok ( Kandang Agropolitan) di Betong enggau nangkir padang bilun di Padang Bilun Bario dikena nangkup peminta nya.
PETROS deka nyadi luan nengeri tu ngaul diri dalam sektor minyak enggau gis chara strategik lalu tu beguna endar ngagai juluk pemansang sosioekonomi Sarawak, maya berengkah nyadi pemain besai industri minyak enggau gis. Datuk Patinggi Abang Johari Tun Abang Openg Kepala Menteri