Musim bubuk meri peluang ngagai orang berikan nambahka belanja
MIRI: Komuniti berikan di Miri berasai lantang enggau penatai musim bubuk diatu benung mayuh ngasuh sida ngulihka penatai pemisi tambah ungkup ruang bilik sida.
Ari sekeda perati di empat bengkah Makit Basah Raban Berikan di Kampung Batu Satu, Lutong, Kampung Piasau Utara, Miri, Kampung Luak, Miri enggau Kampung Kuala Baram, Miri dalam kandang besemak mengeri Miri meda betan tan bubuk dijual di makit begera antara RM3 ngagai RM5 sekilo.
“Tu maya raban berikan ngigi belanja lebih sereta naka ulih diri rambau musim bubuk dikena sida mayar peminta sekula bala anak, mayar jali sereta mega bisi tagit ngena belanja bebelika bot berikan baru,” ku Buang Lamat, siku ari Kaunsil Direktor Serakup Raban Berikan Miri madah ngagai The Borneo Post.
Nitih ku Buang, tu maya orang berikan semina tindu lima ngagai enam aja lalu belelak ba perau panjai sida di tasik ngulihka ikan enggau bubuk.
Ku iya, bala bini enggau sida sebilik ke bukai sedia nganti sida di makit tauka langkau bejual bubuk ngagai sida ti meli bisi datai ari Brunei, Kuching, Semenanjung Malaysia semina deka meli bubuk di Miri ditu.
Ku iya, bubuk ke diulih di kandang tasik Miri manah dikena ngaga belachan lalu peranak suah agi deka meli mayuh rambau musim ngaga undang rangkai, enchalu enggau belachan.
Ku iya, bisi maya rega deka mudah agi lebuh ditangguk lemai hari manggai RM2 sekilo.
“Bubuk endang mayuh peminta ari peranak menua tu, nyengkaum peranak rumah panjai dikena sida ngaga belachan lalu Miri tebilang enggau belachan iya di menua tu sereta mega menua luar (Belachan Miri),” ku Buang.
Ku Buang, kemaya hari semua orang berikan ulih mindah kin kitu sereta ngena raban whatsapp enggau FB sida nemu dini endur besilihka menua bisi mayuh bubuk lalu sida deka mansang kita beraban ngulihka bubuk.
Ku iya, di Miri, rega belachan sekilo manggai RM30 seraya undang rangkai RM10 sekambut.
Direktor Opis Marine Fisheries Sarawak, Belayong Nyuak lebuhka dirandau kemari madah tu maya raban berikan ngiga belanja tambah rambau musim pemanah iya.
Ku iya, orang berikan meseti nitihka atur sebedau ke tasik, bot sida bisi lisin, bisi permit ngulihka bubuk sereta nitihka peminta perengka guna nangguk bubuk tauka ikan.
“Opis tu endang nerima asil ti manah ngagai raban berikan lalu sida deka seruran nyukung komuniti berikan baka ni ngintu chara ngulihka ikan enggau bubuk dikena nentuka utai idup marin deka seruran mayuh,” ku iya.
Belayong nyemetak madah pemesai guna ngintu penyampau ikan enggau utai idup marin nentuka penegap ba pemansut ungkup rebak berikan dudi hari di nengeri tu.
Bala sida meseti ngena perengka guna baka ti dipinta nyengkaum ngena Sobor dikena ngulihka bubuk, ku iya nambah.
Seraya siku indu gawa ngintu ruang bilik berasai gaga maya musim tu laban sida ulih ngena bubuk ngaga mayuh produk.
Rosiah Abdullah, peranak asal ari Kampung Bakam madah bubuk deka digaga mayuh bansa produk nyengkaum undang kering, ti deka dijual di bangsal sereta mega sida ti mansa nengah jalai tebing tasik Miri.
Ku iya, kelimpah ari undang rangkai, iya mega bisi nyual produk enchalu enggau belachan ti bisi peminta ari menua Brunei enggau Singapore.
“Kami berasai lantang maya musim tu datai, kami ulih nambahka belanja mantu laki diri,” ku iya.