JPN nengah PPKhas ngagihka RM100,000 ungkup SK Temenggong Baya Malang
MIRI: Opis Pelajar Nengeri (JPN) nengah projek ngangkatmanah enggau nyeruri sekula ti ngena agih belanja wang turu khas (PPKhas) ungkup taun 2018, deka ngagihka sepenyampau RM100, 000 ungkup Sekula Primari (SK) Temenggong Baya Malang ba Long Terawan, Mulu.
Agih belanja PPKhas iya nya dikena kereja nyeruri perabung, sistem paip enggau sistem jamban ba sekula nya.
Jurujaku opis nya madahka, dikena nambah, piak opis nya mega deka nambah RM60,000 dikena ngemanahka tangki ai ba sekula nya ti dipadah enda dikeibuh lalu nyau luya.
Nitih ku iya agih belanja nya iya nya ti ketiga udah diagih ngagai sekula nya lalu berindik ari nya JPN nyangkal dawa ti madahka SK Temenggong Baya Malang enda kala dikemanah kenyau ari dipenyadi maya muka sekula nya bulan Disember 1981, semua nya enda betul.
Sekula nya dibuka ungkup sesi keterubah sekula kena Januari 1982.
“Dawa nya enda betul laban ba taun 2015, Opis Menteri Pelajar Malaysia udah ngagihka geran sepenyampau RM102,560 dikena ngemanahka bilik kelas sereta kuarters pengajar di sekula nya,” pia ku jurujaku opis nya dalam penerang berita ngagai Utusan Borneo ditu.
Nangkan ke nya, ba taun 2017 sepenyampau RM84,600 sekali agi udah diagihka dikena nyeruri sistem elekterik enggau begunan sekula nya, ku iya nambah.
Dalam penerang ngagai Utusan Borneo ditu kilah ensana, jurujaku opis nya mega udah madah SK Temenggong Baya Malang ngembuan 15 iku nembiak taun tu lalu bisi lapan iku pengajar, dijangka sekula nya deka digempung enggau sekula kebukai.
“Berindik ari penyampau nembiak nya mimit, SK Temenggong Baya Malang nya mega bisi dalam lis pelin ngempung sekula Fasa 3,” ku iya, tang enda manah enggau silik sekula ni ti deka digempung enggau SK Temenggong Baya Malang nya ti dikategori SKM Gred B.
Kena 20 Mac tu tadi, surat berita udah ngeripotka SK Temenggong Baya Malang ti ngembuan dua blok begunan ungkup Standard 1 nyentuk Standard 6, udah dipadah enda dikeibuh lalu majak luya kelimpah ari papan, lantai, tangga enggau tiang kayu majak reput lalu enda likun agi.
Pia mega Chairman Gerempung Apai Indai enggau Pengajar (PIBG) sekula Simon Langang, 56, mega madahka sekula nya endang patut dikemerat sereta diseruri enggau lengkas.
Iya madahka enggau gaya pendiau sekula nya ti udah luya lalu bisi sekeda struktur enda agi likun lalu piak ti bekaul dipinta terus ngemeratka pekara pengelikun di sekula nya, sebedau bisi pekara ti dikenggai nyadi.
“Sekula nya begunaka kereja nyeruri ti mayuh kelebih agi sentang bilik kelas pia mega tangga,” ku iya madah baka ti dibantai dalam ripot surat berita kena 20 Mac tu tadi.